अकोला, वाशीम जिल्ह्यांत पावसाची हजेरी

अकोला : अकोला, वाशीम या दोन्ही जिल्ह्यांमध्ये बुधवारी (ता.२७) सकाळपर्यंत सार्वत्रिक स्वरूपात पाऊस झाला अाहे. या पावसामुळे पेरण्याच्या कामांना गती मिळणार अाहे.

मंगळवारी (ता.२६) दुपारनंतर अकोला जिल्ह्यात अकोट व तेल्हारा हे दोन तालुके वगळता उर्वरित ठिकाणी रात्री उशिरापर्यंत सर्वत्र पावसाने हजेरी लावली. जिल्ह्यात बुधवारी सकाळपर्यंतच्या २४ तासांत सरासरी १८ मिमी पावसाची नोंद झाली असून, मूर्तिजापूर तालुक्यात सर्वाधिक ५२.२ मिमी पाऊस झाला. अकोला तालुक्यात पावसाचा जोर अधिक होता. या तालुक्यात २८.९ मिमी पाऊस झाला.

जिल्ह्यात अद्याप सातपुड्याच्या पायथ्याशी असलेल्या अकोट, तेल्हारा या दोन्ही तालुक्यांमध्ये पावसाचा जोर वाढलेला नाही. बुधवारी सकाळपर्यंत या दोन्ही तालुक्यांत अनुक्रमे ३.३ व ०.५ मिमी पावसाची नोंद झाली. तेल्हारा तालुक्यात जून महिन्यात अातापर्यंत अवघा ५.६ तर अकोटमध्ये १४.५ मिमी पाऊस नोंदला गेला अाहे. बार्शिटाकळी, पातूर, बाळापूर या तालुक्यांमध्ये अनुक्रमे १२, ११.४ अाणि १७.७ मिमी पावसाची नोंद झाली.

अाजवर जिल्ह्यात अकोट व तेल्हारा हे दोन तालुके पावसाच्या बाबतीत बरेच पिछाडीवर राहले अाहेत. जो काही पाऊस झाला तो सलग व सार्वत्रिक नव्हता. ज्या पेरण्या झाल्या त्या कमी पावसामुळे अधांतरीच आहेत. काही ठिकाणी लागवड झालेले क्षेत्र उलटण्याची भीती व्यक्त होत अाहे.            

जिल्ह्यात अातापर्यंत सार्वत्रिक स्वरूपातील पाऊस झालेला नसल्याने पेरण्यांची कामे रखडलेली अाहेत. कृषी विभागाने या हंगामासाठी चार लाख ८० हजार हेक्टर क्षेत्रावर पेरणीचे नियोजन केले अाहे. अातापर्यंत पाच टक्के म्हणजे २५ हजार २१८ हेक्टरवर पेरण्या झाल्या आहेत.

सोयाबीनचे सरासरी पेरणी क्षेत्र दोन लाख १५ हजार हेक्टर असून, त्या तुलनेत सुमारे १६ हजार हेक्टरवर पेरणी झाली. कपाशीची तर अवघी दोन टक्के लागवड झाली अाहे. जिल्ह्यात या वेळी कपाशीचे नियोजित लागवड क्षेत्र १ लाख २१ हजार हेक्टर अपेक्षित असून, केवळ ३४१० हेक्टरवर कपाशी लागवड झाली आहे.