पेरणीच्या गतीला पावसाच्या खंडाने ब्रेक

औरंगाबाद : आधी बोंड अळीचा धसका व आता पावसाच्या खंडाने मराठवाड्यातील बहुतांश भागातील कपाशी लागवड व पेरणीच्या कामाला ब्रेक लागल्याचे चित्र आहे. दमदार ते काही भागांत जोरदार सुरवात करणाऱ्या यंदाच्या पावसाने मराठवाड्यातील खरिपाच्या पेरणीला सुरवात करण्याची संधी निर्माण केली होती. परंतु दोन ते तीन  दिवसांपासून मराठवाड्यात सर्वदूर दिलेल्या उघडिपीने पेरणीच्या गतीला ब्रेक लावण्याचे काम केले आहे. पेरणीचे आकडे अपडेट होणे बाकी असले, तरी मराठवाड्याच्या कृषी विभागाच्या पेरणी अहवालानुसार बीड जिल्ह्यातील माजलगाव व जालना जिल्ह्यातील भोकरदन तालुक्‍यातच काय ती पेरणीची नोंद झाली.

त्यानुसार माजलगाव तालुक्‍यात ४३५ हेक्‍टरवर कपाशीची लागवड करण्यात आली आहे. तर, भोकरदन तालुक्‍यात ५४५ हेक्‍टरवर कपाशी, जवळपास २५०० हेक्‍टरवर मीरची, तर जवळपास शंभर हेक्‍टर क्षेत्रावर ज्वारी-बाजरीची पेरणी आटोपल्याची माहिती कृषी विभागाच्या सूत्रांनी दिली. भोकरदन तालुक्‍यातील केदारखेडा, राजूर व हसनाबाद या तीन मंडळांतच विशेषकरून पावसाचे प्रमाण बरे राहिल्याने पेरणीने गती पकडली होती.

सिंचनाची सोय असलेल्यांच्या पिकांना पावसाच्या या खंडात पाणी देऊन जगविण्याचा प्रयत्न होईलही; परंतु ज्यांच्याकडे कुठलीही सिंचनाची सोय नाही, अशा कपाशी लागवड करणाऱ्या शेतकऱ्यांच्या नजरा आता आकाशाकडे लागल्या आहेत. खामखेडा शिवारात कपाशीची लागवड करणाऱ्या शेतकऱ्यांची पडलेल्या पाण्याच्या भरश्‍ाावर लागवड केलेली जवळपास साठ टक्‍के कपाशी उगवली, तर जवळपास चाळीस टक्‍के बादही झाल्याची माहिती शेतकरी सोमनाथ नागवे यांनी दिली. पावसाच्या आजवरच्या प्रमाणानुसार मराठवाड्यातील ४२१ मंडळांपैकी २७० मंडळांत आजवर अपेक्षित पावसाच्या तुलनेत शंभर टक्‍क्‍यांपेक्षा जास्त पाऊस पडला. तर, उर्वरित मंडळात अपेक्षित पावसाच्या तुलनेत पाऊसच पडला नसल्याची माहिती सूत्रांनी दिली. अनियमित व खंड देणाऱ्या पावसाचा थेट परिणाम खरिपाच्या पेरणीवर झाला आहे.