कोकण, मध्य महाराष्ट्रात पावसाचा अंदाज

पुणे : मॉन्सूनचा प्रवाह मंदावल्यानंतर राज्याच्या बहुतांशी भागांत पावसाने उघडीप दिली अाहे. तर कोकण, मध्य महाराष्ट्र, विदर्भात तुरळक ठिकाणी पाऊस पडत अाहे. मंगळवारपर्यंत (ता. १४) कोकण, मध्य महाराष्ट्रात पावसाचा अंदाज असून, तुरळक ठिकाणी मुसळधारेची शक्यता आहे. तर विदर्भात काही ठिकाणी तर मराठवाड्यात तुरळक ठिकाणी हलक्या ते मध्यम पावसाचा अंदाज हवामान विभागाने वर्तविला आहे.  अांध्र प्रदेश आणि ओडिशाच्या किनाऱ्यालगत समुद्रसपाटीपासून ३.१ ते ५.८ किलोमीटर उंचीवर चक्राकार वारे वाहत असून, सोमवारी सकाळपर्यंतच्या ४८ तासांमध्ये बंगालच्या उपसागरात कमी दाबाचे क्षेत्र तयार होण्यास पोषक स्थिती आहे. यामुळे उत्तर प्रदेश, उत्तराखंड, पूर्व भारतात दोन दिवस जोरदार पावसाचा इशारा आहे. तर दक्षिण भारतात असलेल्या वाऱ्यांच्या पूर्व पश्‍चिम जोड क्षेत्रामुळे केरळसह दक्षिण भारतात पावसाने दणका दिला आहे.  दरम्यान, कमी दाब क्षेत्राच्या प्रभावामुळे रविवार ते मंगळवार या तीन दिवसांत माॅन्सून सक्रिय होऊन सह्याद्रीच्या घाटमाथ्यासह केरळ, कर्नाटक, तमिळनाडूमध्ये पावसाचा जोर वाढण्याची शक्यता आहे. कोकण, मध्य महाराष्ट्रात मंगळवारपर्यंत (ता. १४) तर विदर्भात आज (ता. १२) आणि गुरुवारी (ता. १५) तुरळक ठिकाणी मुसळधारेचा अंदाज आहे. तर अरबी समुद्र आणि बंगालच्या उपसागरामध्ये समुद्र खवळण्याची शक्यता असून, मासेमारीसाठी समुद्रात न जाण्याचा इशारा देण्यात आला आहे. शनिवारी (ता. ११) सकाळपर्यंतच्या २४ तासांमध्ये गडचिरोलीसह पूर्व विदर्भात काही ठिकाणी, मध्य महाराष्ट्रातील सातारा, कोल्हापूरमध्ये तुरळक ठिकाणी जोरदार पाऊस पडला. तर कोकणात हलका ते मध्यम पाऊस पडला तर मराठवाड्यात पावसाची दडी कायम होती. शुक्रवारी (ता. १०) सकाळपर्यंतच्या २४ तासांमध्ये राज्यात पडलेला पाऊस (मिलिमीटरमध्ये - स्राेत कृषी विभाग) कोकण : ठाणे २८, नेरळ ३०, कळंब २५, जांभूळपाडा २८, महाड २१, खारवली २२, माणगाव २२, इंदापूर २१, गोरेगाव २२, लोनेरे २६, खेर्डी २४, मार्गताम्हाणे ३२, रामपूर २०, कळकवणे ३४, शिरगांव ३५, बुरोंडी २०, वेळवी २१, तळवली २५, खेडशी २५, कोंडगाव ३८, देवळे २०, देवरुख २६, अंबोली ५५, कसा २२, तळवडा ३५. मध्य महाराष्ट : धारगाव २५, महाबळेश्‍वर ६१, तापोळा ७६, लामज ८८, करंजफेन ३३, मलकापूर २४, आंबा ६९, राधानगरी २४, साळवण २४, चंदगड २९, नारंगवाडी, माणगाव, कोवाड, तुर्केवाडी, हेरे. विदर्भ : चिखलदरा २०, वडनेर २८, वरुड २०, गिरोली ३०, हिंगणघाट २६, वाघोली २६, सावळी २८, कानदगाव २३, गोंदिया ३०, काट्टीपूर ३०, चांदनखेडा २३, चिमूर ३२, नेरी २२, मासाळ ३६, कोपर्णा ४८, जेवती ४६, पाटण ४७, सिरोंचा ७८, बामणी ४६, पेंटीपका ६७, असारळी ६९.