दक्षिण कोकण, पश्‍चिम महाराष्ट्रात आज पावसाचा अंदाज

पुणे : दक्षिण भारतामध्ये असलेल्या ‘गज’ चक्रीवादळाची तीव्रता कमी झाली अाहे. अरबी समुद्रात असलेल्या या प्रणालीमुळे आजपासून (ता. १८) दक्षिण कोकणातील रत्नागिरी, सिंधुदुर्ग, रायगड आणि दक्षिण मध्य महाराष्ट्रातील कोल्हापूर, सातारा, सांगली, सोलापूर जिल्ह्यांमध्ये हलक्या पावसाची शक्यता आहे. पावसाला पोषक हवामान झाल्याने राज्यातील किमान तापमानात थोडीशी वाढ झाली अाहे.   राज्याच्या तापमानात १ ते ३ अंशांची वाढ झाली असून, पुणे येथे राज्यातील नीचांकी ११.९ अंश सेल्सिअस तापमानाची नोंद झाली आहे. मंगळवारपर्यंत (ता. २०) कोकण, मध्य महाराष्ट्राच्या दक्षिण भागात पावसाची शक्यता आहे. बंगालच्या उपसागरातील ‘गज’ वादळ निवळून शनिवारी अरबी समुद्रात तीव्र कमी दाबाचे क्षेत्र तयार झाले होते. समुद्रात जाताच या कमी दाब क्षेत्राची तीव्रता पुन्हा वाढू लागली अाहे. लक्षद्वीप बेटांजवळ आज (ता. १८) चक्रीवादळ तयार होण्याचे संकेत अाहेत. केरळच्या किनाऱ्यालगतच्या भागात जारेदार वारे वाहणार असल्याने मासेमारीसाठी न जाण्याचा इशारा देण्यात आला अाहे. बंगालच्या उपसागरात दक्षिण अंदमान समुद्राजवळ चक्राकार वारे वाहत असून, आज या भागात नवीन कमी दाबाचे क्षेत्र तयार होण्याचे संकेत हवामान विभागाने दिले आहेत. शनिवारी (ता. १७) सकाळपर्यंतच्या २४ तासांमध्ये राज्यातील विविध ठिकाणचे किमान तापमान, कंसात सरासरीच्या तुलनेत तफावत (अंश सेल्सिअसमध्ये) : पुणे ११.९ (-२), जळगाव १२.४ (-३), कोल्हापूर २०.१ (३), महाबळेश्‍वर १६.६ (२), मालेगाव १५.४ (१), नाशिक १२.२ (-१), सांगली १७.१ (१), सातारा १४.४ (-२), सोलापूर १९.४ (२), सांताक्रूझ १९.६ (-१), अलिबाग २१.५ (१), रत्नागिरी २१.२ (०), डहाणू २१.० (०), आैरंगाबाद १३.७ (०), परभणी १४.५ (-२), नांदेड १७.० (२), उस्मानाबाद १६.९, अकोला १५.५ (-१), अमरावती १७.२ (०), बुलडाणा १६.३ (०), चंद्रपूर १८.२ (२), गोंदिया १५.४ (-१), नागपूर १३.६ (-२), वर्धा १५.२ (-१), यवतमाळ १४.२ (-३).