राज्यावर वादळी पावसाचे सावट

पुणे : कोल्हापूर, सांगलीसह राज्यात गुरुवारी पूर्वमोसमी पावसाने हजेरी लावली. कोल्हापुरात जोरदार वाऱ्यांसह गारपीट झाली. शुक्रवारी सकाळपासूनच राज्यात ढग गोळा झाले होते. रविवारपर्यंत (ता. ८) राज्यावर विजा, मेघगर्जनेसह वादळी पावसाचे सावट कायम राहणार आहे, तर मंगळवारपर्यंत (ता. १०) राज्यात हलका ते मध्यम पाऊस पडण्याचा अंदाज वर्तविण्यात आला आहे.  कोल्हापूर, सांगली जिल्ह्याच्या काही भागांत गुरुवारी (ता. ५) दुपारनंतर वादळी पावसाने हजेरी लावली. कोल्हापूर शहर आणि परिसरात जोरदार वाऱ्यासह सुमारे अर्धा तास गारपीट झाली. शुक्रवारी सकाळपर्यंतच्या २४ तासांमध्ये कोल्हापुरातील हातकणंगले, करवीर, कागल, भुदरगड, आजरा, चंदगड तालुक्यासह विविध भागांत हलका ते मध्यम स्वरूपाचा पाऊस पडला. अाजरा तालुक्यातील माळिंग्रे येथे सर्वाधिक ४० मिलिमीटर, तर अाजरा येथे २० मिलिमीटर पावसाची नोंद झाली, तर करवीर तालुक्यातील करवीर येथे २७ मिमी, कसबा बीड २७, निगवे ७ मिलिमीटर पाऊस पडल्याचे कृषी विभागातर्फे सांगण्यात आले.  दक्षिण कोकणापासून मध्य महाराष्ट्रापर्यंत हवेचा कमी दाबाचा पट्टा असल्याने राज्यात पावसाला पोषक हवामान आहे. शुक्रवारी सकाळपासून रायगड, रत्नागिरी, पुणे, सातारा, सांगली, कोल्हापूर, सोलापूर, बीड, औरंगाबाद, परभणी, जालना, बुलडाणा, अकोला, अमरावती, वर्धा, नागपूर, चंद्रपूरसह राज्याच्या विविध भागांत ढगाळ हवामान झाले होते, तर काही भागांत ऊन- सावल्यांचा खेळ सुरू हाेता. ढगांच्या आच्छादनामुळे उन्हाचा चटका काहीसा कमी झाला. मात्र, उकाड्यात वाढ झाली होती. शुक्रवारी (ता. ६) सकाळपर्यंत चंद्रपूर येथे उच्चांकी ४३.२ अंश सेल्सिअस तापमानाची नोंद झाली.  शुक्रवार (ता. ६) सकाळी साडेआठ वाजेपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३८.६, नगर ४१.५, जळगाव ४२.६, कोल्हापूर ३७.०, महाबळेश्वर ३२.६, मालेगाव ४१.४, नाशिक ३८.१, सांगली ३७.४, सातारा ३८.५, सोलापूर ४०.९, मुंबई ३२.२, रत्नागिरी ३२.२, डहाणू ३४.१, आैरंगाबाद ३९.२, परभणी ४२.०, नांदेड ४०.५, अकोला ४२.७, अमरावती ४०.६, बुलडाणा ३९.४, चंद्रपूर ४३.२, गोंदिया ३९.४, नागपूर ४०.६, वर्धा ४१.७, यवतमाळ ४१.५.