पुणे जिल्ह्यात हलका ते मध्यम पाऊस

पुणे : जिल्ह्यात गुरुवारी (ता. २१) दिवसभर पावसाने उघडीप दिली. परंतु सायंकाळी ढगांनी चांगलीच गर्दी केल्याने सहा वाजेनंतर अनेक भागांत हलक्‍या ते मध्यम स्वरूपाच्या सरी बरसल्या. जुन्नर तालुक्‍यातील राजूर मंडळात सर्वाधिक ६६ मिमी पाऊस झाला. पुंरदर तालुक्‍यात पावसाची उघडीप कायम होती.

गेल्या आठ दिवसांपासून पावसाने जिल्ह्यातील अनेक भागांत जोरदार हजेरी लावली. काही ठिकाणी अतिवृष्टी झाली. परंतु गेल्या दोन दिवसांपासून पावसाचा जोर काहीसा ओसरला आहे. परंतु गुरुवारी (ता.२१) सायंकाळी अनेक ठिकाणी पाऊस पडला. शुक्रवारी दिवसभर पावसाने उघडीप देत सकाळपासून काही भागांत ऊन पडल्याचे चित्र होते.

गेल्या आठ दिवस झालेल्या पावसामुळे भातपिकाला चांगलाच दिलासा मिळाला. परंतु मावळ, मुळशी, भोर, वेल्हा तालुक्‍यांतील काही ठिकाणी नुकसानदेखील झाले आहे. पूर्वेकडील दुष्काळी बारामती, इंदापूर, शिरूर, दौंड तालुक्‍यांनाही पावसाने चांगलाच दिलासा दिला आहे. सध्या या भागांतील तूर, कापूस पिके वाढीच्या अवस्थेत असून,बाजरी, सोयाबीन, मूग, उडीद ही पिके काढणीच्या अवस्थेत आहे. काही ठिकाणी बाजरीची काढणी सुरू झाली आहे.

जोरदार पावसामुळे ओढे, नाले तसेच नद्याही दुथडी भरून वाहत आहेत. धरणांतील पाणीपातळीत वाढ झाली असून, जवळपास सर्वच धरणे भरली आहेत. यामुळे येत्या रब्बी हंगामातही शेतकऱ्यांना गहू, हरभरा आदी पिके घेता येणार आहेत.

मंडळनिहाय शुक्रवारी (ता. २२) सकाळपर्यंत झालेला पाऊस (मिमी) ः हवेली ः पुणे शहर १२.४, केशवनगर १२, खडकवासला ३, थेऊर ३, भोसरी ८, चिंचवड ६, कळस ५, हडपसर ७.  मुळशी  ः पौड १८, घोटावडे ४७, थेरगाव ५, मळे २९, मुठे १५, पिरंगुट ३०.  भोर ः भोर १२, भोळावडे २५, नसरापूर ३, किकवी ५, वेळू ४, आंबावडे २७, संगमनेर ९, निगुडघर २२. 

वडगाव मावळ ः वडगाव मावळ ४, तळेगाव ३, काले १३, कार्ला ८, खडकाळा १८, लोणावळा ३०, शिवणे ९,  वेल्हा ः वेल्हा २३, पानशेत १६, विंझर १२, आंबावणे १०. जुन्नर ः जुन्नर ७, नारायणगाव २, राजूर ६६, डिंगोरे ११, आपताळे ३८, ओतूर ८.  खेड ः वाडा १२.४, राजगुरुनगर२.२, कुडे २४, पाइट ४, चाकण २.१.  आंबेगाव ः घोडेगाव १७, आंबेगाव २५, कळंब ३, पारगाव १, मंचर २. शिरूर ः वडगाव २, कोरेगाव २, शिरूर १० बारामती ः माळेगाव २, मोरगाव ६, उंडवडी ४.  इंदापूर ः भिगवण २, इंदापूर २२.४, लोणी २०, निमगाव ४, अंथुर्णे २, सणसर १.  दौंड ः यवत ३, रावणगाव ५, दौंड १.