अकोले तालुक्‍याच्या पश्‍चिम भागात पाऊस सुरू

नगर   ः जिल्ह्यामधील अकोले तालुक्‍याच्या पश्‍चिम भागात जोरदार पाऊस सुरू आहे. दोन दिवसांपासून सुरू असलेल्या पावसामुळे निळवंडे धरण भरले आहे. या धरणातून ७५४० क्‍युसेक पाणी प्रवरा नदीत सोडण्यात आले. मुळा नदीतूनही मुळा प्रकल्पात पाण्याची ४ हजार ७०५ क्‍युसेकने आवक सुरू आहे. जिल्ह्यातील काही भागात सोमवारी पावसाची रिपरिप सुरू होती.

जिल्ह्यात यंदा अजूनही पुरेसा पाऊस झालेला नाही. अकोले तालुक्‍यात मात्र अधून-मधून सातत्याने पाऊस सुरू आहे. त्यामुळे उत्तर भागाला काही प्रमाणात दिलासा मिळाला. अकोल्याच्या पश्‍चिम भागात होत असलेल्या पावसामुळे यंदाही दरवर्षीप्रमाणे भंडारदरा धरण १५ ऑगस्टपूर्वीच भरल्याचे जाहीर केले. मुळात हे धरण यंदा दरवर्षीपेक्षा पंधरा दिवस आधीच भरले.

दोन दिवसांपासून पुन्हा भंडारदरा, रतनवाडी, कळसुबाई परिसरात पावसाने जोर धरल्यामुळे ९.३० टीएमसी क्षमतेचे निळंवडे धरण रविवारी उशिरा भरल्याचे जलसंपदा विभागाने जाहीर केले. जिल्ह्याच्या अन्य भागात पाऊस नसला तरी अकोल्यात पडत असलेल्या पावसामुळे मुळा धरणातही पाण्याची अावक होत आहे. २६ टीएमसी क्षमतेच्या मुळा मुळा धरणात आतापर्यंत १७.८८ टीएमसी पाणीसाठा झाला आहे. दोन दिवसांपूर्वी जिल्ह्यामध्ये मूर पाऊस झाला. खरिपातील काही पिकांना यामुळे दिलासा मिळाला.

त्यानंतर दोन दिवस उघडीप दिलेल्या पावसाने सोमवारी पुन्हा काही भागात हजेरी लावली. जोरदार नसला तरी पावसाची रिपरिप दुपारनंतर सुरू होती. जिल्ह्यामध्ये आतापर्यंत सरासरीच्या तुलनेत ५४.७४ टक्के पाऊस झाला आहे. अजूनही नेवासा, नगर, पाथर्डी, पारनेर, कर्जत, श्रीगोंदा या तालुक्‍यात ५० टक्‍क्‍यांपेक्षा जास्त पाऊस झालेला नाही. सोमवारी सकाळपर्यंत झालेला पाऊस (मिमी) ः घाटघर ४१, रतनवाडी ३७, पांजरे ३५, वाकी १८, निळवंडे ३, भंडारदरा  २९ .