पुणे जिल्ह्यात पावसाने जून महिन्याची सरासरी गाठली

पुणे : मॉन्सून दाखल होण्यापूर्वी पूर्वमोसमी पावसाने दणक्यात हजेरी लावल्याने पुणे जिल्ह्यात पावसाने सरासरी गाठली आहे. जून महिन्याची सरासरी १३९.९ मिलिमीटर असून, यंदा ३० जूनपर्यंत १३९.८ मिलिमीटर (९९.९ टक्के) पावसाची नोंद झाली आहे. पुणे शहरासह मावळ तालुक्यात सर्वाधिक पावसाची, तर शिरूर व दौंड तालुक्यांत सर्वांत कमी पावसाची नोंद झाली असल्याचे कृषी विभागाने स्पष्ट केले आहे.

जिल्ह्यातील पुणे शहर आणि १३ तालुक्यांचा विचार करता पुणे शहरात १९० मिमी (१७७.७ टक्के) पावसाची नोंद झाली आहे. ग्रामीण भागामध्ये मावळ तालुक्यात सर्वाधिक ३०९.८ मिमी (१६५ टक्के) पाऊस पडला आहे. शिरूर तालुक्यात सर्वांत कमी पाऊस असून, तेथे ५४.२ मिमी (५०.७ टक्के) पाऊस झाला आहे. दौंड तालुक्यात ५०.२ मिमी (६१.६ टक्के) पाऊस पडला आहे.

पश्‍चिम भागातील तालुक्यांमध्ये पूर्वमोसमी पावसाबरोबर मॉन्सूनच्या पावसाने हजेरी लावल्याने सरासरीपेक्षा अधिक पाऊस झाला आहे.पूर्व भागातील दुष्काळी पट्ट्यात पूर्वमोसमी पावसाने दणका दिल्याने पावसात खंड पडूनही सरासरीपेक्षा अधिक पावसाची नोंद झाल्याचे चित्र आहे. यात पुरंदर तालुक्यात १३१.३ मिमी (१४८ टक्के) तर बारामती तालुक्यात १११.९ मिमी (१४२.५ टक्के) तर इंदापूर तालुक्यात १०५.६ मिमी (११४.५ टक्के) पावसाची नोंद झाल्याचे कृषी विभागातर्फे सांगण्यात आले.