अकोले तालुक्‍यात पावसाचा जोर ओसरला

नगर  ः जिल्ह्यात सध्या फक्त अकोले तालुक्‍याच्या पश्‍चिम भागात पाऊस सुरू आहे. तेथेही गुरुवारपासून पावसाचा जोर कमी झाला आहे. शुक्रवारी सकाळ सहा वाजेपर्यंत भंडारदरा धरणात ८०.६१ टक्के पाणीसाठा झाला आहे. मुळा धरणातील पाणीसाठा ४६.७७ टक्‍क्‍यांवर गेला असून, सध्या ३ हजार ४१६ क्‍युसेकने पाण्याची आवक सुरू आहे.

जिल्ह्यातील अकोले तालुक्‍यातील भंडारदरा, हरिचंद्रगड, कळसुबाई शिखर, रतनगड, घाटघर भागातच पाऊस सुरू आहे. जिल्ह्याच्या अन्य भागांत पावसाची प्रतीक्षा कायम आहे. अकोले तालुक्‍यातही गुरुवारपासून पाऊस कमी झाला आहे. शुक्रवारी सकाळपर्यंत चोवीस तासांत घाटघरला २९, रतनवाडीला १, पांजरेला २८, भंडारदरा येथे २३, निळवंडेला ५, कोतुळला ४ मिलीमीटर पाऊस झाला. भंडारदरा धरणात ८८९९, निळवंडेत २८७८, मुळात १२ हजार १६१ दशलक्ष घनफूट पाणीसाठा झाला आहे.

अकोल्यातील जोरदार पावसामुळे मुळा धरणात मागील चार-पाच दिवसांत बऱ्यापैकी पाणीसाठा झाला आहे. चार दिवसांपूर्वी १७ हजार क्‍युसेकने पाण्याची आवक सुरू होती. आता मात्र पाऊस कमी झाल्याने आवक कमी झाली आहे. नांदुर मधमेश्‍वरमधूनही गोदावरीत नदीत २९ हजार क्‍युसेकने आवक सुरू होती. ती कमी करून ६३१० क्‍युसेकवर आली आहे. जिल्ह्याच्या अन्य भागांत मात्र पाऊस नसल्याने गाव तलाव, पाझर तलाव, बंधारे कोरडे आहेत.