पुणे जिल्‍ह्यातील धरणक्षेत्रात पावसाला सुरवात

पुणे : जिल्ह्याच्या पश्‍चिम भागात हलक्या पावसाला सुरवात झाली आहे. सह्याद्रीच्या पूर्व उतारावर असलेल्या धरणांच्या क्षेत्रातही पावसाला सुरवात झाली आहे. साेमवारी (ता. १८) सकाळपासून धरण क्षेत्रात पावसाची रिपरीप सुरू होती. धरणांमध्ये पाणी जमा होण्यास सुरवात झाली असली, तरी धरणातील पाणीपातळीत वाढ होण्यासाठी मोठ्या पावसाची आवश्‍यकता आहे.

पुणे शहराला पाणीपुरवठा करणाऱ्या खडकवासला प्रकल्पातील धरणांच्या पाणलोट क्षेत्रात पावसाच्या सरी पडत आहे. सोमवारी सकाळी आठ वाजेपर्यंत टेमघर येथे २५, वरसगाव येथे १४, पानशेत येथे १३ आणि खडकवासला धरणक्षेत्रात ३ मिलिमीटर पावसाची नोंद झाली.

पवना धरणक्षेत्रात १२, मुळशी धरणक्षेत्रात १३, कलमोडी धरणक्षेत्रात १४, चासकमान धरणक्षेत्रात ३, भामा अासखेड धरणक्षेत्रात ८, आंद्रा धरणक्षेत्रात ४, वडीवळे धरणक्षेत्रात १७ मिलिमीटर पाऊस पडला. नीरा नदीच्या खोऱ्यातील धरणांच्या पाणलोटातील गुंजवणी धरणक्षेत्रात ११, भाटघर धरणक्षेत्रात ३ तर नीरा देवघर धरणक्षेत्रात १० मिलमीटर पावसाची नोंद झाली.

नाझरे धरण परिसरातही हलक्या सरी पडल्या. कुकडीच्या खोऱ्यातील वडज धरणक्षेत्रात ४, डिंभे धरणक्षेत्रात १० आणि उजनी धरणक्षेत्रातही तीन मिलिमीटर पावसाची नाेंद झाल्याचे पाटबंधारे विभागातर्फे सांगण्यात आले.