जळगाव जिल्ह्यातील वाळूठेक्‍यांवरील बंदी उठविली

जळगाव : नागपूर खंडपीठाने स्थगिती उठविल्याने जिल्ह्यातील वाळू गटांचा लिलाव प्रक्रियेचा मार्ग मोकळा झाला आहे. जिल्ह्यात एकूण वाळू चाळीस गटांस भूजल सर्वेक्षण विभागाने मान्यता  दिली. त्यातील सुमारे दहा वाळू गट शासकीय कामांसाठी राखीव ठेवण्यात आले आहे.

गेल्या दोन महिन्यांपासून जिल्ह्यातील वाळू उपशाला बंदी होती. लिलावाच्या प्रक्रियेस नागपूर खंडपीठाने स्थगिती दिली होती. यामुळे दोन-तीन महिन्यांपासून वाळू लिलावाची प्रक्रिया बंद होती. सर्वच वाळू ठेक्‍याची मुदत संपल्याचे कारण त्यामागे होते. उपसा बंदी असूनही चोरट्या पद्धतीने वाळूविक्री सुरूच होती. आता खंडपीठाने वाळू लिलाव करण्यावरील स्थगिती उठविली आहे. यामुळे आता दहा गट शासकीय कामांसाठी राखीव ठेवून उर्वरित तीस वाळू गटांचे लिलाव जिल्हा प्रशासनाला करावे लागणार आहेत.

वाळू लिलावाची लवकरच प्रक्रिया

जिल्हा प्रशासन भूजल सर्व्हेक्षण, पर्यावरण विभाग, गौण खनिज विभागांची बैठक घेणार आहे. यात किती गटांचे वाळू लिलाव करावयाचे, कोणामध्ये काय अडचणी आहेत, याबाबत माहिती जाणून घेऊन वाळू लिलाव प्रक्रिया राबविली जाणार आहे.