दराअभावी 'राजमा' उत्पादक अडचणीत

वाठार स्टेशन, जि. सातारा  ः आंतरराष्ट्रीय बाजारपेठेत मानांकन मिळालेला कोरेगावचा राजमा (घेवडा) दराअभावी घरात पडून ठेवावे लागत असल्याने येथील शेतकरी आर्थिक अडचणीत सापडले आहेत. जिल्ह्यातील उत्तर कोरेगावमध्ये खरीप हंगामातील शेतकऱ्यांना पैसा मिळवून देणारे पीक म्हणून घेवड्याचे उत्पन्न मोठ्या प्रमाणात घेतले जाते. या घेवड्यास जीआय मानांकन मिळाले आहे. जिल्ह्यात कोरेगाव, माण व खटावच्या काही ठराविक भागातच या घेवड्याचे पीक घेतले जाते. घेवडा हा आंतरराष्ट्रीय बाजारपेठेत राजमा या नावाने विकला जातो. घेवड्याचे उत्पन्न आणि त्याला मिळत असलेला दर यावर येथील शेतकऱ्यांची आर्थिक उलाढाल ठरते. यंदा घेवडा पेरणीनंतर पावसाचे प्रमाण कमी असले तरी दडी मारलेल्या माॅन्सूनने अधून-मधून थोडी फार हजेरी लावल्याने समाधानकारक उत्पन्न मिळाले आहे. मात्र, दराअभावी घेवड्याचे पीक अजूनही घरातच पडून असल्याने "चणे आहेत तर दात नाहीत'' अशी अवस्था शेतकऱ्यांची झाली आहे. ८० रुपये दराने पेरणीसाठी घेतलेला घेवडा १५ ते ३० रुपयांपर्यंत विकला जात असल्याने शेतकऱ्यांचे भांडवलसुद्धा निघणे कठीण झाले आहे. रोखे व्यवहार बंद झाल्यामुळे घेवड्याची खरेदी होत नसल्याने त्याचा परिणाम घेवड्याच्या दरावर झालेला दिसून येत आहे. या स्थितीत घेवडा उत्पादक आर्थिक अडचणीत सापडला आहे. - बाळासाहेब देशमुख,  शेतकरी, तळिये