राजस्थानमधील शेतकरी अांदोलनाच्या पवित्र्यात

जयपूर, राजस्थान : स्वामिनाथन अायोगाच्या शिफारशी अाणि शेतकरी अायोग २००४ ची अंमलबजावणी करावी, शेतकरी सुरक्षा कायदा लागू करावा अादी मागण्यांसाठी राज्यस्थानमधील शेतकरी अांदोलनाच्या पवित्र्यात अाहेत. येत्या ३१ ऑगस्टपर्यंत शेतकऱ्यांच्या विविध मागण्यांची पूर्तता राज्य सरकारने न केल्यास राज्यव्यापी आंदोलन करण्याचा इशारा येथील शेतकऱ्यांनी दिला आहे. यासाठी किसान महापंचायतीच्या नेतृत्वात २४ हून अधिक शेतकरी संघटना एकत्र अाल्या अाहेत. याआधी राजस्थानच्या मुख्यमंत्री वसुंधरा राजे यांच्या आश्वासनानंतर शेतकऱ्यांनी १३ ऑगस्टपर्यंत अांदोलन स्थगित केले होते. शेतकऱ्यांना उत्पादन खर्चाच्या दीडपट किंमत मिळावी. तसेच दरवर्षी शेतीमाल खरेदी करण्यासाठी भाव ठरवून द्यावेत अादी मागण्या शेतकऱ्यांनी केल्या अाहेत. त्यासाठी आम्ही ३१ ऑगस्टपर्यंतची मुदत दिली आहे. अन्यथा, राज्यव्यापी आंदोलन करण्याशिवाय आमच्याकडे पर्याय नसल्याचे किसान पंचायतचे अध्यक्ष रामपाल जाट यांनी सांगितले. तसेच या राज्यव्यापी आंदोलनाला राज्यातील २४ हून अधिक शेतकरी संघटनांचा पाठिंबा असल्याचे त्यांनी म्हटले अाहे. राज्यात १५ ते २१ डिसेंबरदरम्यान टप्प्याटप्प्याने आंदोलन करण्यास राज्यातील शेतकऱ्यांनी अनुकूलता दर्शविली आहे. यामध्ये दूध, भाजीपाला, धान्य आणि इतर शेतीमालाचा पुरवठा थांबविण्यात येणार अाहे. २३ डिसेंबर रोजी राज्यातील ४५ हजार गावांतील प्रतिनिधी आपली एकता दाखविणार असल्याचे रामपाल जाट यांनी सांगितले. यासाठी जिल्हा, तालुका आणि गाव पातळीवर सप्टेंबरपासून बैठका, जनजागृती आणि रॅली काढण्यात येणार असल्याचे त्यांनी नमूद केले.