‘त्या’ कार्यकर्त्याचा राजू शेट्टींकडून सन्मान

सोलापूर : कृषी राज्यमंत्री सदाभाऊ खोत यांच्या गाडीवर माढ्यामध्ये शनिवारी (ता. २४) स्वाभिमानी शेतकरी संघटनेच्या कार्यकर्त्याने दगडफेक करून सदाभाऊंवर रोष दाखवला होता. त्या कार्यकर्त्याच्या ‘कामगिरी’चा सन्मान करत त्याच्या पाठीवर खासदार राजू शेट्टी यांनी कौतुकाची थाप दिली. त्यामुळे या दोन्ही नेत्यातील संघर्ष आणखी टोकाला जाणार असल्याची चिन्हे दिसत आहेत.

गेल्या शनिवारी माढा-पंढरपूर दौऱ्यावर असताना मंत्री खोत यांना शेतकऱ्यांच्या रोषाला सामोरे जावे लागले होते. रिधोरेनजीक त्यांच्या गाडीवर दगडफेकही झाली. या घटनेत दगडफेक करणारा कार्यकर्ता बापू गायकवाड याला पोलिसांनी अटक केली होती. रविवारी त्याला जामीन मिळाला. या घटनेनंतर शेट्टी-खोत वादाला चांगलेच तोंड फुटले आहे. सध्या आरोप-प्रत्यारोपांची धुळवड रंगली आहे. या प्रकारावर प्रतिक्रिया देताना खासदार शेट्टी यांनी खोतच काय, मंत्रिमंडळातील सगळ्या मंत्र्यांच्या गाड्या शेतकऱ्यांकडून अडवल्या जातील, असे सांगून सरकार आणि मंत्री खोतांवर शाब्दिक हल्ला केला. त्यावर मंत्री खोत यांनीही सुरवात तुम्ही केली, पण शेवट आम्ही करणार असे प्रत्युत्तर देऊन पुन्हा आपली शाब्दिक धार कायम ठेवली होती. या घडामोडी घडतात न घडतात तोच, सोमवारी (ता. २६) खासदार राजू शेट्टी हे माळशिरस तालुक्‍यातील भांबुर्डी येथे एका कार्यक्रमासाठी आले होते. त्या वेळी खोत यांच्या गाडीवर दगडफेक करणारा कार्यकर्ता बापू गायकवाड याला खास बोलावणे पाठवून या कार्यक्रमात खासदार शेट्टी यांनी त्याचा सन्मान करत त्याच्या पाठीवर कौतुकाची थाप दिली. दरम्यान, या सगळ्या प्रसंगावरून शेतकरी संघटनांतील हा संघर्ष टोकाला जात असल्याचे दिसते आहे.