बेदाणा दरात वाढ होण्याची शक्यता

सांगली : फळ छाटणी दरम्यान झालेल्या पावसामुळे द्राक्ष बागांवर रोगाचा प्रादुर्भाव झाला होता. त्यामुळे बेदाणा उत्पादनात सुमारे २५ टक्के घट होण्याची शक्‍यता बेदाणा उत्पादक शेतकऱ्यांनी वर्तविली आहे. बेदाण्याचे उत्पादन घटणार असले तरी बेदाण्याचे दरात वाढ होईल, असा अंदाज व्यक्त होतो आहे.

सांगली जिल्ह्यात बेदाणा हंगाम सुरू झाला आहे. बेदाणा निर्मितीस मार्चच्या पहिल्या आठवड्यात गती येईल. सध्या बाजारात नवीन बेदाण्याची आवक कमी अधिक प्रमाणात असली तरी गेल्यावर्षी शिल्लक असलेल्या बेदाण्याचे सौदे सुरू आहेत. बेदाण्याला प्रति किलोस १०० ते १६० रुपये असा दर मिळू लागला आहे. गेल्या महिन्यापेक्षा चालू महिन्यात बेदाण्याच्या दरात १५ ते २० रुपयांनी वाढ झाली असल्याची माहिती बाजार समितीच्या सूत्रांनी दिली.

द्राक्ष हंगाम सुरू होताना अवकाळी पावसाने द्राक्ष बागांचे मोठ्या प्रमाणात नुकसान झाले. यामुळे शेतकरी हतबल झाला. मात्र, त्यातूनही पुन्हा फळ छाटणी शेतकऱ्यांनी घेतली. मात्र, बेदाणा निर्मितीपासून ते विक्रीपर्यंतच्या खर्चात वाढ झाली आहे. त्यामुळे अनेक बेदाणा उत्पादक शेतकऱ्यांनी द्राक्षांची विक्री केली आहे. या दोन कारणांमुळे बेदाणा उत्पादनात घट होण्याची शक्‍यता आहे.

उत्तर प्रदेशातून बेदाण्याला मागणी... गेल्यावर्षी द्राक्ष हंगामात चांगला गेला. कोणत्याही नैसर्गिक आपत्तीने शेतकऱ्यांचे नुकसान केले नाही. तसेच द्राक्षाला चांगले दर असल्याने द्राक्षाची विक्री केली. त्यामुळे बेदाणा उत्पादन १० टक्‍क्‍यांनी घटले होते. मात्र, बेदाण्याला अपेक्षित दर नसल्याने शेतकरी चिंतेत होता. यंदा नवीन बेदाणा कमी अधिक प्रमाणात बाजारात दाखल होतो आहे. त्यात होळीचा उत्सवाला उत्तर प्रदेशमध्ये बेदाण्याला मागणी अधिक असते. यामुळे बेदाण्याच्या दरात वाढ झाली आहे. यंदाच्या हंगामात बेदाण्याचे उत्पादन कमी होण्याची शक्‍यता असल्याने दर वाढण्याची शक्‍यता आहे.