शेतकरी सरकारवर पुरता समाधानी : रावसाहेब दानवे

नगर ः देशात आणि राज्यात सरकारने शेतकरी हिताचे निर्णय घेतले. वेगवेगळ्या योजनांच्या माध्यमातून शेतकरी पुरता समाधानी आहे. त्यामुळे कॉँग्रेस-राष्ट्रवादी व अन्य विरोधकांनी कितीही बाता मारल्या, टीका केली तरी शेतकरी आमच्या बाजूनेच आहे. आमचे सरकार चांगले काम करत आहे. म्हणून तर गेल्या चार वर्षांत झालेल्या सर्व निवडणुका भाजपने जिंकल्या आहेत असा दावा भाजपचे प्रदेशाध्यक्ष रावसाहेब दानवे यांनी केला. यानंतरही आमचीच सत्ता येईल, शिवसेना भाजपवर आजिबात नाराज नाही. ते आमच्यासोबतच आहेत, असेही श्री. दानवे म्हणाले. भारतीय जनता पक्षातर्फे ‘एक बूथ पंचवीस यूथ’ उपक्रम राबवला जात असून, त्याचा आढावा घेण्यासाठी सोमवारी (ता. ८) श्री. दानवे नगरला आले होते. श्री. दानवे म्हणाले, की शेतीमालाला दर मिळावा यासाठी दीडपट हमीदर, कर्जमाफी व अन्य शेतकऱ्यांसाठी महत्त्वाचे निर्णय घेतले. सरकारने शेतकऱ्यांना न्याय मिळावा, अशीच सरकारची भूमिका राहिली आहे. शेतकरी सरकारच्या कामावर समाधानी आहे. केंद्रात राज्यात सरकारचे काम चांगले आहे. त्यामुळे चार वर्षांत पंधरा महापालिका आणि दहा जिल्हा परिषदांत सत्ता मिळवली. आताही पाच राज्यांत होत असलेल्या निवडणुका भाजपच जिंकेल. कोणत्याही कामाचे मुल्यमापन करण्याचे साधन म्हणजे निवडणूका आहेत. आम्ही चांगले काम केले, म्हणून तर राज्यातील सर्व निवडणुका जिंकल्या आहेत. लोकसभा आणि विधानसभेतही भाजपच सत्तेवर येणार आहे. आगामी निवडणुका आम्ही २०१४ ला सोबत असलेल्या समविचारी पक्षांना बरोबर घेण्याचा प्रयत्न असेल, पण जर सन्मानाची युती झाली नाही तर मग स्वबळावर लढण्याची भाजपची तयारी झाली आहे. राज्यातील ९८ हजार बूथपैकी ८३ हजार बूथची बांधणी पूर्ण झालेली आहे.  पालकमंत्री राम शिंदे, खासदार दिलीप गांधी, आमदार मोनिका राजळे, बाळासाहेब मुरकुटे, माजीमंत्री बबनराव पाचपुते, पक्षाचे जिल्हाध्यक्ष प्रा. भानुदास बेरड या वेळी उपस्थित होते.