कच्ची साखर निर्यातीसाठी इंडोनेशियाला प्राधान्य

कोल्हापूर : भारतातून कच्ची साखर इंडोनेशियात निर्यात करण्याच्या दृष्टीने प्रयत्न सुरू झाले आहेत. वाहतुकीच्या दृष्टीने हा देश जवळ असल्याने त्यांच्याशी निर्यातीचा करार करण्याबाबतचे प्रयत्न राष्ट्रीय सहकारी साखर कारखाना महासंघाकडून सुरू आहेत. इंडानेशियाने भारतातून साखर आयात करण्याचे ठरविले, तर त्याचा फायदा साखर उद्योगाला होऊ शकतो. कच्ची साखर निर्यात करण्यासाठी इंडोनशियाबरोबरच चीन, तर पक्‍क्‍या साखरेच्या निर्यातीसाठी श्रीलंका, बांगलादेश आदी देशांच्या धोरणावरही नजीकच्या काळात अभ्यास करून सकारात्मक बोलणी अपेक्षित आहेत. 

इंडोनेशियाशी प्राथमिक बोलणी  जगात ब्राझील व थायलंडमध्ये सर्वाधिक कच्ची साखर तयार होते. इंडोनेशियात त्यांना हवी तेवढी साखर तयार होत नसल्याने त्यांना कच्ची साखर आयात केल्याशिवाय पर्याय नाही. हा देश बाहेरील राष्ट्रावर अवलंबून आहे. थायलंडने याबाबत इंडोनेशियाशी करार करताना आयात शुल्क इतर देशांच्या तुलनेत कमी करून घेतले. फक्त ज्यावेळी हवी असेल, त्यावेळी साखर उपलब्ध करून देण्याचा सामंजस्य करार या दोन देशांत आहे. यामुळे दोन्ही देशांना त्याचा फायदा झाला. असाच करार भारतालाही करता येईल का, याबाबत प्रयत्न सुरू आहेत. इंडोनेशियाच्या शिष्टमंडळाशी प्राथमिक बोलणीही झाली. 

इतर पदार्थ करण्याकडेही कल हवा  सध्याच्या साखर उद्योगाकडे पाहिले तर पक्‍क्‍या साखरेला बाहेर काहीच मागणी नसते. यामुळे भारतात जर अतिरिक्त साखर झाली तर ती बाहेर विकता येत नाही. सरकारी धोरणे व आंतरराष्ट्रीय मागणी याचा विचार केल्यास पक्की साखर निर्यात करण्याचा धंदा हा आतबट्ट्याचा होऊ शकतो, असे तज्ज्ञांचे मत आहे. यापेक्षा कच्ची साखर व मोलॅसिस, इथेनॉलची निर्मिती ही फायदेशीर ठरू शकते, असा सूर साखर उद्योगाचा आहे. कच्या साखरेची निर्गत झाल्यास कारखान्यांचा ताण हलका होऊ शकतो, असा या उद्योगाचा प्रवाह आहे. 

पुण्यात विचारमंथन शक्‍य  राष्ट्रीय सहकारी साखर कारखाना महासंघाच्या शिष्टमंडळाने नुकतीच वाणिज्यमंत्री सुरेश प्रभू यांच्याशी भेट घेतली. झालेल्या चर्चेत इंडोनेशियाचा मार्ग त्यांना संयुक्तिक वाटला. श्री. प्रभू यांनी तातडीने हालचाली करीत या उद्योगातील अधिकारी, तज्ज्ञ यांना सूचना देऊन काय करता येईल, याबाबत बैठक घेण्याचे आदेश दिले. काही दिवसांत ही बैठक पुण्यात होण्याची शक्‍यता आहे. चीन, श्रीलंका, बांगलादेश या पर्यायावर चर्चा होऊन बैठकीत विचारमंथन होण्याची दाट शक्‍यता आहे. साखर तज्ज्ञांबरोबर केंद्र सरकारचे प्रतिनिधी, अधिकारीही सहभागी होतील. 

भविष्यात निर्यातीबाबत काय करता येईल, याची पाहणी करण्यासाठी महासंघाचे पदाधिकारी शेजारील देशांचा दौरा करून परिस्थितीचा अंदाज घेणार आहेत. यानुसार निर्यातीचे सकारात्मक वातावरण तयार करण्याचे काम हे पदाधिकारी करतील. केंद्र सरकार त्यांच्या पातळीवरचे करार करेल. दोन्हीच्या समन्वयाने बाहेरच्या देशात निर्यातीसाठी प्रयत्न करण्यात येतील. तज्ज्ञांबरोबर विचारमंथन करणे व देशांना भेटून परिस्थिती जाणून घेण्याबाबतचा प्रस्ताव महासंघाने श्री. प्रभू यांना दिला आहे.  - प्रकाश नाईकनवरे,  व्यवस्थापकीय संचालक,  राष्ट्रीय सहकारी साखर कारखाना महासंघ