शेतकऱ्यांच्‍या थकवलेल्या पैशांची अडत्यांकडून वसुली 

पुणे ः शेतीमालाचा लिलाव झाल्यानंतर २४ तासांत पैसे देण्याचा कायदा असतानादेखील गुलटेकडी येथील पुणे कृषी उत्पन्न बाजार समितीमधील अडत्याने ५२ कांदा उत्पादक शेतकऱ्यांचे सुमारे ४९ लाख रुपये थकवले होते. शेतकऱ्यांच्या तक्रारींनंतर थकविलेले पैसे बाजार समितीने वसूल करून दिले आहेत. यामुळे शेतकऱ्यांना दिलासा मिळाला असला तरी, पुढे असे प्रकार होऊ नयेत यासाठी अडत्यांवर कडक कारवाई करत, या पैशांवरील व्याजदेखील मिळावे, अशी मागणी होऊ लागली आहे. 

बाजार समितीमधील मे. पिंपळे आणि कंपनी या गाळ्यावर ५२ कांदा उत्पादक शेतकऱ्यांनी कांदा विक्री केला होता. मात्र, अडत्याकडून पैसे देण्यास विलंब आणि टाळाटाळ होत होती. यानंतर शेतकऱ्यांनी बाजार समितीकडे लेखी तक्रार केली. बाजार समिती प्रशासक बी. जे. देशमुख यांनी यात लक्ष घालून संबंधित तक्रारींवर सुनावणी घेत शेतकऱ्यांना ४९ लाख ६२ हजार २२४ रुपये परत मिळवून दिले.

याबाबत शेतकरी श्‍यामराव फडतरे (रा. बोपगाव, ता. पुरंदर) म्हणाले, ‘‘काही महिन्यांपूर्वी मे. पिंपळे आणि कंपनी या गाळ्यावर ५ टन कांदा विक्री केली होता. त्याची पट्टी सुमारे ७१ हजार रुपयांची   झाली. मात्र, वारंवार अडत्याला   भेटूनदेखील त्याच्याकडून पैसे दिले जात नव्हते. बाजार समितीकडे तक्रार केल्यानंतर समिती प्रशासनाने दखल घेत पैसे मिळवून दिले.’’

कांदा उत्पादक शेतकऱ्यांनी कांदा विक्रीचे सुमारे ६४ लाख १३ हजार ९१० रुपये दिले नसल्याची तक्रार केली होती. त्यानुसार बाजार समितीने संबंधित आडत्याने किती पैसे दिले आणि किती बाकी आहेत, याची शहानिशा करून सर्व अर्जांवर सुनावणी घेतली. त्यानंतर सर्व तक्रारदार शेतकऱ्यांचे ४९ लाख ६२ हजार २२४ रुपये त्यांना मिळवून दिले. बाजार समिती शेतकऱ्यांच्या हितासाठीच कार्यरत आहे. पुणे बाजार समितीत शेतकऱ्यांची फसवणूक अथवा पैसे थकविल्यास तत्काळ कार्यवाही करून शेतकऱ्यांना न्याय देण्याचे काम केले जाते. अडते पैसे थकवित असतील, तर त्याची शेतकऱ्यांनी तातडीने तक्रार करावी. त्याची तत्काळ दखल घेतली जाईल. - बी. जे. देशमुख, प्रशासक, कृषी उत्पन्न बाजार समिती पुणे.