पलटी नांगर, रोटाव्हेटरचे अनुदान वाढणार : जळगाव जिल्हा परिषद

जळगाव : जिल्हा परिषदेच्या आगामी अंदाजपत्रकात (स्वनिधी) कृषी विभागासाठी तरतूद वाढविली जाण्याची शक्‍यता आहे. यातच पलटी नांगर व रोटाव्हेटर योजनेसाठीचे अनुदान पुढील वित्तीय वर्षात लाभार्थी शेतकऱ्यांना वाढवून दिले जाईल, अशी माहिती जिल्हा परिषदेतील कृषी विभागातर्फे देण्यात आली.  

पलटी नांगर योजनेसह रोटाव्हेटरला मागील काही वर्षांत चांगला प्रतिसाद मिळाला. कृषी विभागातर्फे या योजना राबविल्या जातात. परंतु बाजारात किमान ७५ हजारांपासून दर्जेदार पलटी नांगर मिळतो. त्यासाठी जिल्हा परिषद प्रत्येकी २५ हजार रुपये अनुदान देते. हे अनुदान तोकडे असल्याचे शेतकरी, लाभार्थींनी वारंवार जिल्हा परिषदेचे सदस्य, पदाधिकारी यांच्या लक्षात आणून दिले. 

रोटाव्हेटरसाठी ३० हजार रुपये अनुदान या वित्तीय वर्षात देण्यात आले. दर्जेदार रोटाव्हेटर लाख रुपयांपुढेच मिळतो. डीबीटीमुळे प्रथम बाजारात खरेदी करून पूर्वसंमती मिळाल्यास अनुदानासाठी शेतकरी प्रस्ताव सादर करतात. ते मार्गी लावून घेण्यासाठी सदस्य, पदाधिकाऱ्यांकडे सतत पाठपुरावादेखील करावा लागतो. असे असतानाही शेतकऱ्यांचा प्रतिसाद या योजनांना मिळाला. त्यामुळे रोटाव्हेटर व पलटी नांगरसाठी पुढील वित्तीय वर्षात प्रत्येकी ४० हजार व ३० हजार रुपये अनुदान देण्यात येईल. या संदर्भात कृषी समिती अंतिम निर्णय घेणार असल्याचे सांगण्यात आले.

पाइप योजनेचे अनुदान खर्च

कृषी विभागात मध्यंतरी निधी खर्चाची धावपळ सुरू होती. यात बॅटरीचलित फवारणी पंप व एचडीपीई पाइप योजनेसाठी ९० टक्‍क्‍यांवर खर्च झाला. निधी शिल्लक नाही. कुठलाही निधी वळविण्याची गरज अधिक नाही, असे कृषी विभागातील सूत्रांनी स्पष्ट केले.