रत्नागिरीत खतनिर्मिती कारखान्यावर छापा

रत्नागिरी : येथील एमआयडीसी परिसरात मच्छीच्या कुटीवर प्रक्रिया करून विनापरवाना खतनिर्मिती करणाऱ्या कारखान्यावर कृषी विभागाच्या पथकाने बुधवारी (ता. १९) कारवाई केली. खताच्या पिशवीवर नमूद केलेले घटक पिशवीत घेण्यात आले नाहीत. ते खत बोगस आहे, असे कृषी विभागाकडून सांगण्यात आले.

कारखान्यातील सहा हजार पिशव्या जप्त केल्या असून त्याची किंमत सुमारे ३५ लाख रुपयांपर्यंत आहे. ही कारवाई कृषी विभागाच्या जिल्हास्तरीय पथकामार्फत करण्यात आली. संबंधित कारखानदाराविरोधत फौजदारी गुन्हा दाखल करण्यात येणार आहे. पावसाळ्यात शेतकऱ्यांना खताची गरज भासते. याचा लाभ उठवून सेंद्रीय खताच्या नावाखाली बोगस खताची विक्री केली जाते. रत्नागिरी शहराजवळ मिरजोळे एमआयडीसीत अ‍ॅबीशिअस फिश मिलमध्ये बोगस सेंद्रीय खताची निर्मिती गेले काही दिवस सुरु आहे.

मंगळवारी (ता. १८) राजापूर तालुक्यातील केळशी येथे एका विक्री केंद्रात हे बोगस खत विक्रीसाठी ठेवण्यात आले होते. ही बाब कृषी पर्यवेक्षकाच्या निदर्शनास आल्यानंतर जिल्हास्तरीय पथकाने ते खत जप्त केले. तसेच कारखान्यावर धाड टाकली. जिल्हा परिषद कृषी विकास अधिकारी आरिफ शहा, जिल्हा गुणनियंत्रण निरीक्षक जी. आर. मुरकुटे, विनोद हेगडे, विशाल जाधव यांच्या पथकाने ही कारवाई केली.

हा कारखाना सिराज काझी यांच्या मालकीचा आहे. मच्छी कुजवून त्यात सोयाबीन टाकून सेंद्रीय खत तयार केले जाते. शंभरटक्के विघटनशील सेंद्रीय खत म्हणून प्रेटीनयुक्त सुपिका या नावाने खताची विक्री केली जात आहे. सुमारे चाळीस किलो वजनाचे पोते ५५० रुपयाला विकले जाते. याच ठिकाणी २००६ ते ०९ सीटी कंपोस्ट खताची निर्मिती होत होती; परंतु २००९ मध्ये परवाना संपल्यानंतर काझी यांनी प्रोटीनयुक्त सुपिका खतनिर्मितीला सुरवात केली. त्यासाठीचा आवश्यक कोणताही परवाना शासनाकडून घेतला नाही. हा कारखाना सील करण्यात आला असून ग्रामीण पोलिसांकडे तक्रार देण्यात आली असल्याचे शहा यांनी सांगितले.