रेफ्यूजी लागवडीने बोंड अळीचा प्रादुर्भाव रोखणे शक्‍य : डॉ. जाधव

नांदेड : बीटी कपाशीच्या सभोवती बिगर बीटी (नॉन बीटी) कपाशीची लागवड केलेल्या शेतामध्ये गुलाबी बोंड अळीचा प्रादुर्भाव कमी झाल्याचे आढळून आले आहे. त्यामुळे प्रत्येक शेतकऱ्याने बीटी कपाशीचे तंत्रज्ञान योग्य पद्धतीने राबविणे आवश्‍यक आहे, असे प्रतिपादन कृषी आयुक्तालयातील संचालक (विस्तार) डॉ. सु. ल. जाधव यांनी केले.

डॉ. जाधव यांनी वारंगाफाटा (जि. हिंगोली) येथील बालाजी भीमराव कदम यांच्या शेतातील बीटी कपाशीच्या पिकांची पाहणी नुकतीच केली आहे. या वेळी डॉ. जाधव म्हणाले, की भारतात २००२ मध्ये बीटी कपाशीचे तंत्रज्ञान आले. बीटी कपाशीच्या बियाण्यासोबत नॉन बीटी कपाशीचे बियाणेदेखील मिळत असते. कापसावरील बोंड अळ्या बीटी तंत्रज्ञानास प्रतिकारक्षम बनू नये, म्हणून लागवड करत असताना बीटी कपाशीच्या चारही बाजूंनी नॉन बीटी बियाण्याची लागवडदेखील करायची असते. त्यामुळे शेतकऱ्यांनी नॉन बीटीचे बियाणे फेकून देऊ नये.

कपाशीचा हंगाम संपल्यानंतर फरदड कापूस उत्पादन घेतले जात असल्यामुळे आता बीटी कपाशीवर गुलाबी बोंड अळी हल्ला करू लागल्याने शेतकऱ्यांनी बीटी कपाशीच्या चारही बाजूंनी नॉन बीटी कपाशीची लागवड करावी. फरदड कपाशीचे उत्पादन घेऊ नये. गुलाबी बोंड अळीग्रस्त कपाशीचे पीक उपटून नष्ट करावे, असा सल्ला डॉ. जाधव यांनी शेतकऱ्यांना दिला. या वेळी कृषी विभागाचे अधिकारी, कर्मचारी उपस्थित होते.