द्राक्ष बागायतदार संघाचा मार्केटिंग, ब्रॅँडिंगवर भर ः राजेंद्र पवार

नाशिक  : ‘‘गोड चवीची, रेसीड्यू सिड्यू फ्री द्राक्ष उत्पादन मिळविण्यात प्रयोगशील द्राक्ष उत्पादकांनी यश मिळवले आहे. गुणवत्तेमुळे जागतिक, देशांतर्गत बाजारपेठेत मागणी वाढत आहे. येत्या काळात राज्य द्राक्ष बागायतदार संघाकडून द्राक्षांच्या मार्केटिंग व ब्रॅँडिंगवर भर देण्यात येणार आहे``, असे प्रतिपादन राज्य द्राक्ष बागायतदार संघाचे अध्यक्ष राजेंद्र पवार यांनी केले.

द्राक्ष बागायतदार संघाचे ‘ऑक्‍टोबर छाटणी'' या विषयावरील विभागीय चर्चासत्र शुक्रवारी (ता. ५) येथील दादासाहेब गायकवाड सभागृहात झाले. यावेळी श्री. पवार अध्यक्षस्थानी होते. संघाचे माजी अध्यक्ष अशोक गायकवाड, सह्याद्री फार्मर प्रोड्युसर कंपनीचे अध्यक्ष विलास शिंदे, संघाचे खजिनदार कैलास भोसले, संचालक माणिकराव पाटील, विभागीय अध्यक्ष रवींद्र बोराडे, कृषी उपसंचालक नरेंद्र आघाव, राष्ट्रीय द्राक्ष संशोधन केंद्राचे संचालक डॉ. एस. डी. सावंत, डॉ. सोमकुंवर, डॉ. अजय उपाध्याय, मधुकर क्षीरसागर उपस्थित होते.

श्री. पवार म्हणाले, ‘‘जगभरात विविध पिकांचे संघ, मंडळे स्थापन झाली आहेत. त्याद्वारे शेतकरी व सरकार एकत्रितपणे आपल्या प्रश्‍नांवर मार्ग काढतात. संघ मागील ६० वर्षांपेक्षा अधिक काळापासून द्राक्षशेतीसाठी कार्यरत आहे. संघाकडून द्राक्ष उत्पादकांना प्रमाणित जीए, खते आदी निविष्ठा रास्त दरात उपलब्ध करून दिली जात आहेत त्याला प्रतिसाद वाढत अाहे. त्यातून होणाऱ्या स्पर्धेमुळे बाजारातील शेतकऱ्यांची अडवणूक कमी झाली आहे.``

`द्राक्षांच्या नवीन जाती व त्यांचे व्यवस्थापन'' या परिसंवादात प्रयोगशील द्राक्ष उत्पादक चंद्रकांत लांडगे, अजित नरोटे, सुरेश एकुंडे, विनायक पाटील, रघुनाथ झांबरे, अनंत मोरे यांनी मार्गदर्शन केले. आघाव यांनी शासनाच्या विविध योजनांची माहिती दिली. संघाचे नाशिक विभागाचे सचिव अरुण मोरे यांनी सूत्रसंचालन केले.  

शिंदे म्हणाले, द्राक्षांच्या उत्पादनावर खूप चांगलं काम शेतकऱ्यांनी आणि शास्त्रज्ञांनी केलं आहे. १५ हजार कोटींची क्षमता असणाऱ्या द्राक्ष उद्योगासाठी सुसंघटित मार्केटिंग मॉडेल उभे राहण्याची गरज आहे. त्यासाठी सरकारी पातळीवरही धोरणात्मक निर्णय होणे आवश्‍यक आहे.