मृद-जलसंधारणाच्या कामांसाठी नोंदणी करावी

पुणे : सार्वजनिक बांधकाम विभागाकडे नोंदणीकृत असणाऱ्या कंत्राटदारांना मृद व जलसंधारणाची कामे करण्यासाठी ई-निविदा प्रक्रियेत सहभागी होण्यास मान्यता दिलेली आहे. मृद व जलसंधारणाची कामे करण्यासाठी मशिनधारकांनी जिल्हा अधीक्षक कृषी अधिकारी यांच्याकडे नोंदणी करण्याचे आवाहन जिल्हा अधीक्षक कृषी अधिकारी बी. जे. पलघडमल यांनी केले.

सामान्य प्रशासन विभागाच्या २६ नोव्हेबर २०१४ च्या निर्णयानुसार तीन लाखांपेक्षा अधिक रक्कमेची कामे ई-निविदाद्वारे करण्याचे आदेश आहेत. त्यानुसार मृद व जलसंधारणाची सर्व कामे ई-निविदाद्वारे करण्यात येत आहेत. ही कामे ई-निविदाद्वारे करण्यासाठी सार्वजनिक बांधकाम विभागाकडील नोंदणीकृत कंत्राटदार असणे अनिवार्य आहे.

तथापि मृद व जलसंधारणाची कामे छोटी-छोटी व विखुरलेल्या स्वरुपात असल्याने बऱ्याच वेळा सार्वजनिक बांधकाम विभागाकडे नोंदणी असलेले कंत्राटदार ई-निविदा प्रक्रियेमध्ये भाग घेत नाहीत. याचा विचार करून मृद व जलसंधारण विभागाच्या परिपत्रकानुसार जिल्हा अधीक्षक कृषी अधिकाऱ्यांच्याकडे मशिनधारकांची नोंदणी करून त्यांना सार्वजनिक बांधकाम विभागाकडे नोंदणीकृत असणाऱ्या कंत्राटदाराप्रमाणे मृद व जलसंधारणाची कामे करण्यासाठी ई-निविदा प्रक्रियेत सहभागी होण्यास मान्यता दिलेली आहे.

मशिनधारकांनी नमूद कागदपत्रांसह जिल्हा अधीक्षक कृषी अधिकारी यांचेकडे नोदणी करावी. जिल्हा अधीक्षक अशा मशिनधारकांना नोंदणी प्रमाणपत्र देतील. अशा नोंदणीकृत मशिनधारकास फक्त सिमेंट नाला बांध व वळण बंधारा वगळून अन्य मृदा व जलसंधारण कामाच्या ई निविदेमध्ये कंत्राटदार म्हणून भाग घेता येईल.

सिमेंट नाला बांध व वळण बांधारा या उपचाराच्या ई-निविदेध्ये भाग घ्यावयाचा असल्यास मशिनधारकास सार्वजनिक बांधकाम विभागाकडील नोंदणी अनिवार्य राहील. ई-निविदेतील अटी व शर्तीनुसार काम न केल्यास नोंदणीकृत मशिनधारकास काळ्या यादीत टाकण्याचे अधिकार जिल्हा अधीक्षक कृषी अधिकारी यांना जिल्हास्तरीय समितीच्या मान्यतेने राहतील.

पात्रता असलेल्या मशीनधारकांनी कंत्राटदार म्हणून नोंदणी करुन ई-निविदेमध्ये भाग घेण्यासाठी जिल्हा अधीक्षक कृषी अधिकारी यांच्याकडे संपर्क साधण्याचे आवाहन करण्यात आले आहे.

यंत्र धारकासाठी आवश्यक पात्रता

मशिनधारक महाराष्ट्रातील रहिवासी असावा, स्वत:च्या मालकीची किंवा या प्रवर्गामध्ये असणारी तत्सम मशिनरी असावी,  पॅन कार्ड,  आधार कार्ड, राष्ट्रीयीकृत बँकेतील खाते, जीएसटी क्रमांक नोंदणी शुल्क म्हणून पाच हजार रुपयांचा जिल्हा अधीक्षक कृषी अधिकारी यांच्या नावे धनाकर्ष अर्जासोबत जमा करणे

नोंदणीसाठी लागणारे कागदपत्रे - ओळखपत्र  पॅनकार्ड, आधारकार्ड  जीएसटी क्रमांक बँक खाते पुस्तक,  यंत्रांचे आर. सी. बुक  टीसीबुक, विमा पाॅलिसी  आयकर भरणा प्रमाणपत्र,  व्यवसाय कर भरणा प्रमाणपत्र व तत्सम कर भरणा प्रमाणपत्र