ग्रामसभेतच शेतकऱ्यांची ई-नाम पोर्टलवर नोंदणी

लातूर : राज्यात राष्ट्रीय कृषी बाजार (ई-नाम) ही योजना हळूहळू प्रभावीपणे राबविण्याचा निर्णय घेतला आहे. यातून जास्ती जास्त शेतकरी ई-नाम पोर्टलवर कशापद्धतीने येतील याचा प्रयत्न केला जात आहे. यातून आता प्रजासत्ताकदिनी होणाऱ्या ग्रामसभेत ई-नामची अंमलबजावणी करणाऱ्या बाजार समितीच्या कार्यक्षेत्रातील गावांच्या ग्रामसभेत शेतकऱ्यांची ई-नामवर नोंदणी करण्यात येणार आहे.

असा उपक्रम संबंधीत बाजार समितींनी राबवावा, असे आदेश पणन मंडळाने दिले आहेत. केंद्र शासनाच्या राष्ट्रीय कृषी बाजार (ई-नाम) योजनेअंतर्गत राज्यातील ६० कृषी उत्पन्न बाजार समित्यांची दोन टप्प्यात निवड झालेली आहे. योजनेच्या कार्यप्रणालीप्रमाणे बाजार समितीमध्ये आलेल्या सर्व शेतमालाची ई-नाम पोर्टलवर गेट एन्ट्री, लॉट मॅनेजमेंट, शेतमालाची गुणवत्ता तपासणी, ई लिलाव, शेतमालाच्या वजनाची नोंद, आॅनलाईन पेमेंट, आउट गेट एन्ट्री या प्रमाणे आॅनलाइन कामकाज होत आहे. बाजार समित्यात येणारे शेतकरी प्रामुख्याने ग्रामीण भागातून येतात.

या शेतकऱ्यांना ई-नाम योजना व त्याचे फायदे माहिती होणे गरजेचे आहे. या योजनेला गती देण्यासाठी मुंबईत मुख्यमंत्री देवेंद्र फडणवीस यांनी १२ जानेवारीस बैठक घेऊन सूचनाही दिल्या आहेत. यातूनच आता प्रजासत्ताकदिनी (ता. २६) बाजार समित्यांच्या कार्यक्षेत्रातील गावात होणाऱ्या ग्रामसभेत या योजनेचा प्रचार व प्रसार करावा; तसेच गावातील सर्व शेतकऱ्यांची ई-नाम पोर्टलवर नोंदणी करावी.

याकरिता ग्रामसभेत ई-नाम डेस्क तयार करावा. या पोर्टलवर ग्रामसभेतच शेतकऱ्यांची सर्व माहिती भरून घेण्याच्या सूचना पणन मंडळाने दिल्या आहेत. तसेच या संबंधीचा अहवाल ३१ जानेवारीपर्यंत पाठवावा, असे आदेशही मंडळाने दिले आहेत.

लातूर उच्चत्तम कृषी उत्पन्न बाजार समितीचा ई-नाममध्ये समावेश आहे. प्रजासत्ताकदिनी (ता. २६) समितीच्या कार्यक्षेत्रातील प्रमुख वीस गावात या विषयाची जागृती करून शेतकऱ्यांची नोंदणी करण्यात येणार आहे. यात गंगापूर, हरंगुळ (खु.), पेठ, वासनगाव, ममदापूर, चांडेश्वर, मुरुड, चिखुर्डा, मळवटी, खंडापूर, पाखरसांगवी, बाभळगाव, सेलू, बोरी, बोरवटी, भातखेडा, कव्हा, कासारखेडा, सिकंदरपूर, उरमगा या गावांचा समावेश आहे. याकरिता नियोजन करण्यात आले आहे. - मधुकर गुंजकर, सचिव, लातूर उच्चत्तम कृषी उत्पन्न बाजार समिती.