कडधान्य खरेदीच्या नोंदणीस शेतकरी संघात नकार

जळगाव : केंद्र शासनाने शासकीय उडीद व मुगाच्या खरेदीला १२ जानेवारीपर्यंत मुदतवाढ दिल्यानंतर शेतकरी, धान्य विक्रीसंबंधी नोंदणीसाठी शेतकरी संघात गेले असता, त्यांना नोंदणी न करता कर्मचाऱ्यांनी उर्मटपणा करून परत पाठविले. हा प्रकार शेतकरी संघात आसोदे (ता. जळगाव) येथील एका शेतकऱ्याबाबत घडला असून, या शेतकऱ्याने आपल्याबाबत घडलेल्या प्रकाराची माहिती ॲग्रोवनला दिली.

यातच उडीद व मुगाच्या खरेदीला शासनाने मुदतवाढ दिल्याचे सांगितले जात असले तरी अजून नोंदणीसंबंधी मार्केटिंग फेडरेशनला कोणतेही आदेश नसल्याचेही समोर आले आहे. आसोदे येथील सचिन चौधरी यांचा ४० गोण्या उडीद विकायचा राहिला आहे. सध्या बाजार समितीत ४८०० रुपयांवर दर नाहीत. अधिक दर सांगितले जात असले तरी अडतदार एवढे दर मिळू देत नाहीत. यातच केंद्र शासनाने उडीद व मुगाच्या शासकीय खरेदीसंबंधी मुदतवाढ दिली.

शासकीय खरेदी केंद्रात पाच हजार ४०० दर होते. यामुळे सचिन चौधरी हे जळगाव तालुका सहकारी शेतकरी खरेदी विक्री संघात उडीद विक्रीबाबतच्या नोंदणीसाठी गेले. या केंद्रात नोंदणी करून घेण्यासाठी चौधरी यांनी संबंधित कर्मचाऱ्यास सांगितले. परंतु संबंधित कर्मचाऱ्याने कुठलीही शासकीय उडीद खरेदी सुरू नाही. आम्हाला सूचना नाहीत, ज्यांनी शासकीय उडीद खरेदीला मुदतवाढ दिल्याचे तुम्हाला सांगितले त्यांच्याकडे जा, असे संबंधित कर्मचाऱ्याने उर्मटपणे सांगितले. यामुळे आपण हताश होऊन शेतकरी संघातून परतलो, असे चौधरी म्हणाले.

आम्हाला अजून उडीद व मूग खरेदीच्या नोंदणीचे आदेश नाहीत, त्यामुळे नोंदणी सुरू नाही. परंतु ज्यांनी मुदतीत नोंदणी केली होती. त्यांचा उडीद आम्ही खरेदीची मुदत संपल्यानंतरही खरेदी केला. शासनाच्या आदेशानंतरच नोंदणी करता येईल. - परिमल साळुंखे, पणन अधिकारी, मार्केटिंग फेडरेशन

खरेदीला मुदतवाढीचे वृत्त शासनाने जारी केले, मग खरेदीसाठी नोंदणीही सुरू करायला हवी. शेतकऱ्यांची दिशाभूल करण्याचा व त्यांच्या अडवणुकीला प्रोत्साहन देण्याचा प्रकारच शासन करीत आहे. - सचिन चौधरी, तक्रारदार शेतकरी, आसोदे (जि. जळगाव)