कृषी क्षेत्रातील उत्पन्नाची तफावत दूर करा : डॉ. दांगट

कृषी क्षेत्रातील उत्पन्नाची तफावत दूर करा : डॉ. दांगट
कृषी क्षेत्रातील उत्पन्नाची तफावत दूर करा : डॉ. दांगट

औरंगाबाद : गेल्या कित्येक वर्षांतील परिवर्तनात औद्योगिक व सेवाक्षेत्राचा सातत्याने लाभ झाल्याचे दिसत असला तरी कृषी क्षेत्राचा लाभ झाल्याचे दिसत नाही. त्यामुळे या क्षेत्रामधील उत्पन्नाची तफावत दूर करावी लागेल. विक्रीच्या बाजारपेठेत आजही शेतकरी भरडला जातोय. त्यामुळे मुक्‍त बाजारपेठ, कमी निर्बंधांची गरज आहे. त्यासाठी कालबाह्य कायद्यांचा नव्याने आढावा घेण्याची गरज आहे, असे मत माजी आयुक्‍त तथा महाराष्ट्र ग्राम सामाजिक परिवर्तन अभियानाचे कार्यकारी संचालक डॉ. उमाकांत दांगट यांनी व्यक्‍त केले.

औरंगाबाद येथे गुरुवारी आयोजित गटशेतीस प्रोत्साहन व सबलीकरणासाठीच्या कार्यशाळेच्या समारोपीय सत्राच्या अध्यक्षस्थानावरून ते बोलत होते. इन्स्टिट्यूशन ऑफ अग्रिकल्चरल टेक्‍नॉलॉजिस्ट्‌स इन्स्टिट्यूशन ऑफ इंजिनिअर्स व महाराष्ट्र शासनाच्या कृषी विभागाच्या समन्वयातून ही एकदिवसीय कार्यशाळा घेतली गेली. विभागीय आयुक्‍त डॉ. पुरुषोत्तम भापकर यांची उपस्थिती लाभली. वनामकृविचे कुलगुरू डॉ. अशोक ढवण, माजी कुलगुरू डॉ. राजाराम देशमुख, पणनचे व्यवस्थापकीय संचालक सुनील पवार, डॉ.आर के गायकवाड, गोकूळचे अरुण नरके, विभागीय कृषी सहसंचालक प्रतापसिंह कदम, अधीक्षक कृषी अधिकारी डॉ. टी. एस. मोटे, डॉ. भगवानराव कापसे, डॉ. सुभाष पाटणे, डॉ. के. एस. मुळें आदींची उपस्थिती होती.

डॉ. दांगट म्हणाले, ‘‘बाजार समितीच्या कायद्यामधील सुधारणा अजूनही शेतकऱ्यांपर्यंत गेल्या नाहीत. दुष्काळाचे चक्र भेदण्यासाठी उत्पादन, पणन, निर्यात या विषयांना दुग्धोत्पादनाची जोड द्यावी लागेल.`` डॉ. भापकर म्हणाले, ‘‘दुष्काळाशी दोन हात करण्याची तयारी प्रशासनाने केली आहे. शासनानेही मदतीचा हात पुढे करताना मराठवाड्यासाठी १००० गट स्थापन करण्यास मंजुरी दिली आहे. त्यामाध्यमातून १००० कोटी रुपये या गटांना मिळणार आहेत.``

‘‘मॉन्सून आणि मार्केटच्या समस्येतून शेतकऱ्यांना बाहेर काढावे लागेल. एकट्याने तो या संकटाचा सामना करू शकणार नाही म्हणून त्याला समूहाने याचा सामना कसा करता येईल हा विषय महत्त्वाचा आहे, असे डॉ. ढवण म्हणाले.

माजी कुलगुरू डॉ. राजाराम देशमुख, डॉ. भगवानराव कापसे, डॉ. तुकाराम मोटे, विजय चोले, गोविंद हांडे, सुनील पवार, गणेश हिंगमिरे आदींनी विविध विषयांवर मार्गदर्शन केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com