कर्जमाफीच्या यादीची दुरुस्ती सुरूच

जळगाव : कर्जमाफीच्या कार्यवाहीबाबत रोजच नवीन त्रुटी समोर येत असून, दुरुस्तीचे काम सुरूच आहे. हा प्रकार सुरूच राहिला तर दीड लाखावरील कर्जदार शेतकरी ३१ मार्चपर्यंत आपले एनपीए (नॉन पररफॉर्मिंग ॲसेट) खाते कसे नियमित करून घेतील, हा प्रश्‍न उपस्थित झाला आहे.

पूर्ण खरीप हंगामात कर्जमाफीचे ऑनलाइन अर्ज आणि त्यासंबंधीच्या अडचणींमध्ये शेतकऱ्यांना मनस्ताप सहन करावा लागला. आता रब्बी हंगाम अर्धाअधिक संपत आला आहे, तरीही कर्जमाफीचा घोळ सुरू आहे. हे शेपूट असेच लांबत आहे. जिल्ह्यात अलीकडेच सात हजार लाभार्थी शेतकऱ्यांची दुबार नावे तपासण्यासाठी यलो यादी आली असून, त्यासंबंधी सुनावण्या सुरू झाल्या आहेत.

दुसऱ्या बाजूला ज्या शेतकऱ्यांचे कर्ज दीड लाख रुपयांवर आहे, त्यांना आपले एनपीए खाते ३१ मार्चपर्यंत नियमित करून घेण्याचे निर्देश आहेत. दीड लाख रुपये शासन देईल व उर्वरित रक्कम संबंधित शेतकऱ्याला भरायची आहे. परंतु या योजनेसंबंधी ज्या शेतकऱ्यांनी ऑनलाइन अर्ज भरले, त्यातील अनेकांची नावे ग्रीन यादीत आलेली नाहीत. त्यांना कर्जमाफीचा लाभ मिळेल की नाही, हे अजून स्पष्ट झालेले नाही. आता जानेवारी महिना अंतिम टप्प्यात येत आहे. पुढे दोन महिने आहेत. या कालावधीतही यलो यादी आणि रेड यादी असा घोळ सुरूच राहिला, तर संबंधित शेतकरी ऑनलाइन अर्ज भरूनही या योजनेपासून वंचित राहतील.

दुसऱ्या बाजूला शासन आम्ही कर्जमाफी दिली; पण शेतकऱ्यांनी लाभच घेतला नाही, असे सांगून मोकळे होईल. परंतु कर्जमाफीच्या यादीमधील घोळ मिटत नसल्याचे स्वीकारायला प्रशासन व शासन तयार नसल्याचा आरोप शेतकरी करू लागले आहेत. संबंधित शेतकऱ्याचे नावच ग्रीन यादीत आले नाही, तर तो कर्जमाफीचा लाभ घेणार कसा, असा मुद्दा शेतकरी सचिन चौधरी (आसोदा, जि. जळगाव) यांनी उपस्थित केला आहे.