नांदेड, परभणी, हिंगोली जिल्ह्यात जलाशयात पाणीसाठ्यात घट

नांदेड ः नांदेड, परभणी, हिंगोली जिल्ह्यातील लघू मध्यम, मोठ्या प्रकल्पांच्या जलशयातील उपयुक्त पाणीसाठ्यात वाढते तापमान, बाष्पीभवन, उपसा यामुळे घट सुरू असल्यामुळे पाणीटंचाईचे सावट दिवसागणिक गडद होत चालले आहे.

नांदेड जिल्ह्यातील ९ लघू प्रकल्पांतील उपयुक्त पाणीसाठा संपला आहे. दोन तलाव कोरडे पडले आहेत. सहा तलावांतील उपयुक्त पाणीसाठा १० टक्केपेक्षा खाली गेला आहे. लघू प्रकल्पांमध्ये सरासरी ६१.५९ टक्के पाणीसाठा शिल्लक राहिला आहे. मध्यम प्रकल्पांमध्ये सरासरी ४४.९४ टक्के उपयुक्त पाणीसाठा राहिला आहे. नांदेड जिल्ह्यातील ८८ लघू प्रकल्पांमध्ये सरासरी ६१.५९ टक्के उपयुक्त पाणीसाठा राहिला आहे.

देगलूर, मुखेड, लोहा तालुक्यातील लघू प्रकल्पांच्या तलावातील पाणीसाठा झपाट्याने घट होत आहे. देऊळगाव, चांडोळा, हणेगाव १, हणेगाव २, उंद्री-मांजरी, आडगाव, वझरा, दापकी या तलावातील उपयुक्त पाणीसाठा संपला आहे. दहा टक्केपेक्षा कमी उपयुक्त पाणीसाठा असलेल्या तलावांमध्ये भेंडेवाडी, मुखेड, आखरगा, जामखेड, वसुर, सलगरा या सहा तलावांचा समावेस आहे. बोमनाळी आणि मोहिना परंडा तलाव कोरडे पडले आहेत.

रविवारी (ता. २८) पैठण येथील जायकवाडी प्रकल्पामध्ये ३१ टक्के, येलदरी धरणामध्ये ९.०८ टक्के, सिद्धेध्वर धरणामध्ये १८.८७ टक्के, परभणी जिल्ह्यातील निम्न दुधना प्रकल्पामध्ये १९.२३ टक्के, करपरा मध्यम प्रकल्पामध्ये ६४ टक्के, मासोळी मध्यम प्रकल्पामध्ये ४ टक्के, डिग्रस बंधाऱ्यामध्ये ५६.९१ टक्के, मुद्दगल बंधाऱ्यामध्ये ४८.२१ टक्के, ढालेगाव बंधाऱ्यामध्ये ५०.४१ टक्के, मुळी बंधाऱ्यामध्ये २.८४ टक्के उपयुक्त पाणीसाठा शिल्लक होता.

भूजलपातळी खोल गेली परभणी जिल्ह्यातील २२ लघू तलावांमध्ये सरासरी ३९ टक्के उपयुक्त पाणीसाठा होता. हिंगोली जिल्ह्यातील २६ लघू प्रकल्पांमध्ये सरासरी ७९.५२ टक्के उपयुक्त पाणीसाठा होता. सर्वच प्रकल्पांच्या जलाशयातील पाणीसाठ्यामध्ये घट सुरू आहे. भूजल पातळी खोल गेली आहे. त्यामुळे येत्या उन्हाळ्यात पाणीटंचाईची समस्या उग्र रूप धारण करण्याची चिन्हे आत्तापासूनच दिसू लागली आहेत.