जालन्यातील कृषी माल निर्यात सुविधा केंद्राचे पुनरुज्जीवन

जालना : येथील कृषी उत्पन्न बाजार समितीच्या आवारातील निर्यात सुविधा केंद्राचे पुनरुज्जीवनाचे काम पूर्ण झाले आहे. शनिवारी (ता. २३) या निर्यात सुविधा केंद्राचे उद्‌घाटन होणार आहे. आंब्यासोबतच द्राक्ष, डाळिंब, केळी, पिकांसाठीही रायपनींग चेंबर, प्रीकूलिंग, शीतगृह व निर्यातीची सुविधा उपलब्ध करून देण्यात आल्याची माहिती बाजार समितीच्या वतीने देण्यात आली आहे. 

जवळपास चौदा वर्षांपूर्वी राज्याच्या कृषी पणन मंडळाने अपेडामार्फत जालना कृषी उत्पन्न बाजार समितीच्या आवारात आंबा निर्यात केंद्राची उभारणी केली होती. १२ जून २००४ ला उद्‌घाटन झालेल्या या निर्यात सुविधा केंद्राचे काम जवळपास २०१४ पर्यंत चालले. त्यानंतर मात्र या केंद्रावरून आंब्याची निर्यात झाली नाही. त्यामुळे निर्यात केंद्र बंद पडले होते. बंद पडलेल्या या निर्यात केंद्राला चालविण्याची तयारी बाजार समितीने प्रदर्शित केली. त्यानंतर त्याविषयीचे सोपस्कार शासनाच्या नियमानुसार पार पडले.

जालना बाजार समितीने १ नोव्हेंबर २०१७ जालना बाजार समितीकडे या निर्यात केंद्राची सूत्रे आली. त्यामुळे बाजार समितीने शेतकऱ्यांची गरज व केंद्र सुरू राहण्यासाठी आवश्‍यक बाबीची चाचपणी केली. त्यानुसार जवळपास दीड वर्षांपासून निर्यात केंद्रात आवश्‍यक ते बदल करून घेतले. त्यामध्ये आंब्यासोबतच द्राक्ष, डाळिंब व केळी या पिकांसाठीही रायपनिंग चेंबर, प्रीकूलिंग, शीतगृह आदी सुविधा उपलब्ध करून घेतले. त्यामुळे आता या केंद्रावरून कृषी माल निर्यातीची संधी प्राप्त होणार आहे.

या वेळी शासनाचा पुरस्कार प्राप्त शेतकरी उद्धवराव खेडेकर, रवींद्र गोर्डे, पुंजारा भूतेकर, जयकिसन शिंदे यांचा सत्कार करण्यात येणार असल्याची माहिती बाजार समितीचे सचिव गणेश चौगुले यांनी दिली.

शनिवारी उद्‌घाटन  राज्याचे वस्त्रोद्योग, पशुसंवर्धन, दुग्धविकास व मत्स्य व्यवसाय विभागाचे राज्यमंत्री अर्जुनराव खोतकर यांच्या हस्ते या कृषी माल सुविधा केंद्राचे उद्‌घाटन होणार आहे. या वेळी जिल्हा परिषदेच अध्यक्ष अनिरुद्ध खोतकर, कृषिभूषण विजयअण्णा बोराडे, जिल्हाप्रमुख भास्करराव अंबेकर, ए. जे. बोराडे, माजी आमदार संतोष सांबरे, भाजपा जिल्हाध्यक्ष रामेश्वर भांदरगे, उपजिल्हाप्रमुख पंडितराव भूतेकर, कृषिभूषण उद्धवराव खेडेकर, सभापती पांडुरंग डोंगरे आदींची उपस्थिती राहणार आहे.