प्रियांका गांधींचा नागपुरात होणार रोड शो

नागपूर ः काँग्रेस उमेदवाराच्या प्रचारार्थ पक्षाच्या सरचिटणीस प्रियांका गांधी यांचा रोड शो आणि जाहीर सभा पुढील महिन्यात नागपुरात होणार आहे.  भाजपच्या आक्रमक निवडणूक प्रचाराला शह देण्यासाठी प्रदेश काँग्रेसने नवनियुक्‍त सरचिटणीस प्रियांका  गांधी यांना महाराष्ट्रात सभेसाठी साकडे घातले आहे. त्या महाराष्ट्रात तीन सभा घेणार असल्याचे काँग्रेसमधील सूत्रांनी सांगितले. नागपुरात त्या ४ किंवा ६ एप्रिलला येणार असल्याचे लोकसभा उमेदवार नाना पटोले यांनी पत्रकार परिषदेत जाहीर केले होते. मात्र, शहर काँग्रेसने ५ एप्रिलला सभेसाठी जिल्हाधिकाऱ्यांकडे अर्ज केला आहे. नागपूरमध्ये केंद्रीय मंत्री नितीन गडकरी भाजपचे उमेदवार आहेत. संघभूमी आणि दीक्षाभूमी असल्याने नागपूरमध्ये काँग्रेस आणि भाजपच्या स्टार प्रचारकांच्या सभा होणार आहेत. नितीन गडकरी यांच्या प्रचारासाठी पंतप्रधान नरेंद्र मोदी येण्याची शक्‍यता आहे. पंतप्रधानांच्या नागपूर आणि अमरावती अशा दोन सभांचे नियोजन भाजपने केले आहे.