पुणे जिल्ह्यात दोन हजार हेक्टरवर भात रोपवाटिका

पुणे  ः गेल्या पंधरवड्यात पश्चिमेकडील तालुक्यांतील काही भागांत पाऊस झाला. त्यामुळे शेतकऱ्यांनी भात लागवडीसाठी रोपवाटिकेची तयारी सुरू केली आहे. जिल्ह्यात आत्तापर्यंत दोन हजार ३५ हेक्टरवर भात रोपवाटिका तयार झाल्या आहेत. चालू आठवड्यात चांगला पाऊस झाला, तर वेळेवर भातरोप लागवडी होणार आहे.  

यंदा जिल्ह्यात सुमारे साठ हजार हेक्टरवर भात लागवड होण्याचा अंदाज आहे. त्यासाठी १५ ते २० दिवस आधी शेतकरी रोपवाटिका तयार करतात. सध्या भात रोपवाटिकेची कामे अंतिम टप्प्यात आहेत. अनेक ठिकाणी भात रोवाटिकेतील रोपे वाढीच्या अवस्थेत आहेत. येत्या आठ दिवसांत चांगल्या पावसाची शेतकऱ्यांना अपेक्षा आहे. पुढील आठवड्यात भात रोपवाटिकेतील रोपांच्या पुनर्लागवडीस सुरवात होणार आहे.

यंदा शेतकरी भात लागवडीसाठी यांत्रिकीकरणास जास्त प्राधान्य देण्याची शक्यता आहे. त्यामुळे अनेक शेतकऱ्यांनी कृषी विभागाच्या अधिकाऱ्यांच्या मार्गदर्शनाखाली रोपवाटिका तयार केल्या आहेत. या रोपवाटिकेतील रोपेही लवकरच लागवडीसाठी तयार होणार असल्याची शक्यता आहे.

भाताबरोबर नाचणी पिकाच्या लागवडीची तयारी शेतकऱ्यांनी सुरू केली आहे. जिल्ह्यातील मुळशी, भोर, मावळ, वेल्हे, जुन्नर, खेड, आंबेगाव तालुक्यांतील शेतकऱ्यांनी नाचणी पिकाच्या रोपवाटिका तयार केल्या आहेत. या रोपवाटिकेतील रोपांची लागवड रोपे टाकल्यानंतर पंधरा ते वीस दिवसांनी होते. जिल्ह्यात एकूण ६५ हेक्टरवर नाचणीच्या रोपवाटिका झाल्या आहेत.