सगरोळी केव्हीकेतर्फे बोंड अळी नियंत्रणासाठी विशेष मोहीम

सगरोळी, जि. नांदेड ः सगरोळी (जि. नांदेड) येथील संस्कृती संवर्धन मंडळाच्या कृषी विज्ञान केंद्रातर्फे बोंड अळी नियंत्रणासाठी एकात्मिक व्यवस्थापन तसेच कीडनाशकांची विषबाधा रोखण्यासाठी प्रतिबंधात्मक उपाययोजना याबाबत शेतकऱ्यांना माहिती देण्यासाठी बुधवार (ता. २२) ते शुक्रवार (ता. ३१) या कालावधीत विशेष पीक संरक्षण मोहीम राबविण्यात येत आहे.

होट्टल (ता. देगलूर) येथे बुधवारी (ता. २२) या मोहिमेचे उद्‌घाटन तालुका कृषी अधिकारी शिवाजी शिंदे यांच्या हस्ते करण्यात आले. या वेळी सरपंच श्री. सूर्यवंशी यांच्यासह शेतकरी मोठ्या संख्येने उपस्थित होते. नांदेड जिल्ह्यातील जवळपास सर्वच भागात बोंड अळीचा प्रादुर्भाव दिसून येत आहे. त्यामुळे बोंड अळीचे एकात्मिक कीड व्यवस्थापन पद्धतीने नियंत्रण करण्यासाठी सगरोळी येथील कृषी विज्ञान केंद्रातर्फे ही विशेष पीक संरक्षण मोहीम राबविली जात आहे.

केव्हिकेच्या कार्यक्षेत्रातील बिलोली, नायगाव, धर्माबाद, देगलूर, मुखेड, कंधार, लोहा, उमरी या तालुक्यांतील २५ ते ३० गावांतील शेतकऱ्यांच्या शेतावर जाऊन किडीच्या प्रादुर्भावाची लक्षणे, किडीची ओळख, उपाययोजना, कामगंध सापळ्याचे महत्त्व व पिकांमध्ये उभारणी प्रात्यक्षिक, डोमकळ्या ओळखून नष्ट करणे, ५ टक्के निंबोळी अर्क तयार करून त्याची फवारणी घेणे, फवारणी करताना सुरक्षा किटचा वापर आदी प्रात्याक्षिके घेतली जात आहेत.

कृषी विज्ञान केंद्रातील प्रा. कपिल इंगळे, डॉ. पराग तुरखडे, डॉ. दत्ता मेहत्रे, वैजनाथ बोंबले, नानाजी देशमुख कृषी संजीवनी प्रकल्पातील समन्वयक परिसरातील शेतकऱ्यांच्या शेतावर जाऊन माहिती देत आहेत.