समृद्धीच्या दरातील तफावतीचा मुद्दा ऐरणीवर

औरंगाबाद (प्रतिनिधी) : समृद्धी मार्गबाधित शेतकरी व प्रशासनाची बैठक गुरुवारी (ता. ३०) जिल्हाधिकारी कार्यालयाच्या सभागृहात पार पडली. या बैठकीत शेतकऱ्यांनी एकाच दरातील तफावतीबाबत विचारलेल्या प्रश्‍नांवर प्रशासन निरुत्तर झाले. तर खासदार चंद्रकांत खैरे यांनी समृद्धी मार्गबाधितांसह ऊस उत्पादक शेतकऱ्यांचे प्रश्‍नांचे प्रशासकीय स्तरावरून तातडीने निराकरण करण्याची सूचना प्रशासनाला केली.

समृद्धी महामार्गासाठी भूसंपादनात औरंगाबाद अव्वल ठरले आहे. असे असताना हवा तसा दर मिळत नसल्याने जमिनी देण्यास आजही काही शेतकऱ्यांचा विरोध आहे. या विषयावर गुरुवारी (ता. ३०) प्रकल्पबाधित शेतकऱ्यांसह झालेल्या बैठकीत खासदार चंद्रकांत खैरे यांनी एकाच गट नंबरमध्ये दोन भाव का देता, असे म्हणत अधिकाऱ्यांचे कान टोचले. मोजमाप, भूसंपादन, दरातील तफावत आदी तक्रारी प्रशासनाने स्वतः मिटविण्याची सूचना करत ऊस उत्पादक शेतकरी, समृद्धी बाधित शेतकरी व प्रशासन समन्वय बैठक त्यासाठीच घेतली असल्याची माहिती त्यांनी दिली.

जिल्हाधिकारी नवल किशोर राम यांनी शेतकऱ्यांच्या भावना शासनाकडे पोचविणार असल्याचे सांगितले. बैठकीस अतिरिक्त जिल्हाधिकारी सोरमारे, समृद्धी महामार्ग बाधित शेतकरी नानासाहेब पळसकर, बाळू हेकडे, वैजापूर, गंगापूर ,पळशी, बकलपूर, वरूड, पालखेड आदी गावांचे शेतकरी, उपजिल्हाप्रमुख कृष्णा पाटील डोंनगावकार, अनिल पोलकर, तालुकाप्रमुख रमेश बोरणारे, केतन काजे, भूपेश पाटील, मारुती राठोड आदींसह अधिकारी-शेतकरी मोठ्या संख्येने उपस्थित होते.

राज्यातील दहा जिल्ह्यांतून जाणाऱ्या मुंबई-नागपूर समृद्धी महामार्गासाठी भूसंपादन करताना बागायती जमिनींना जिरायतीचे दर दिले. तसेच एकाच जमिनीची १ कोटी ४५ लाख आणि २३ लाख अशा मोठ्या फरकाने खरेदी होत असल्याने काही शेतकऱ्यांत संताप आहे. एक प्रकल्प एक दर याप्रमाणे जमिनीला भाव द्या, अशी मागणी जिल्हाधिकारी कार्यालयातील बैठकीत शेतकऱ्यांनी केली.

फतियाबाद येथील बाळू हेकडे म्हणाले, ‘‘आम्ही हाडाचे शेतकरी आहोत. एक एकर जमिनीच्या मोबदल्यात जवळपास एक एकर जमीन घेता यायला हवी; मात्र तसे सध्या मिळणाऱ्या पैशात ते शक्‍य नाही. बाजारभाव ७० लाखांचा सुरू असताना १७ ते २४ लाखांपर्यंतचे दर देऊ केले आहेत.

नाना पळसकर म्हणाले, ‘‘जमीन देण्याची आमची इच्छाच नाही. आता आम्ही तयारी दाखवतोय, तर आजूबाजूच्या शेतकऱ्यांप्रमाणेच दर का देत नाहीत. वैजापूर येथील प्रा. रमेश बोरनारे यांनीही परिसरातील शेतकऱ्यांच्या जमिनीच्या दरातील तफावत मांडली. शेतकरी व प्रशासनाच्या समन्वयासाठी झालेल्या या बैठकीचे काय फलीत निघते याकडे समृद्धीबाधितांचे लक्ष लागले आहे.