समृद्धी महामार्गबाधित शेतकऱ्यांचे उपोषण

औरंगाबाद : एकीकडे शासनाकडून महत्त्वाकांक्षी समृद्धी महामार्गासाठी जमिनी खरेदीची सपाटा सुरू असताना शेतकऱ्यांवर अन्यायाची प्रकरणेही समोर येत आहेत. वैजापूर गंगापूर तालुक्‍यातील ‘समृद्धी’बाधित शेतकऱ्यांनी सोमवारी (ता. २३) जिल्हाधिकारी कार्यालयासमोर लाक्षणिक उपोषण केले. जमीन बागायती असताना अलीकडे केवळ तीन वर्षे बागायत नसल्याचे कारण करून त्यांना बागायती जमिनीचा मोबदला देण्यापासून वंचित ठेवण्यात आल्याचा शेतकऱ्यांचा आरोप आहे. 

वैजापूर मतदारसंघाचे आमदार भाऊसाहेब पाटील चिकटगावकर यांच्या नेतृत्वात ‘समृद्धी’बाधित शेतकऱ्यांनी औरंगाबाद जिल्हाधिकारी कार्यालयासमोर उपोषण केले. या संदर्भात आमदार श्री. चिकटगावकर यांनी जिल्हा प्रशासनाला वस्तुस्थिती अवगत करणारे निवेदन सादर केले. त्यानुसार त्यांच्या वैजापूर गंगापूर मतदारसंघातील शेतकऱ्यांची जमीन समृद्धी महामार्गासाठी संपादित केली जाणार आहे; परंतु या संपादित केल्या जाणाऱ्या जमिनीच्या सर्वेक्षणात ज्या शेतकऱ्यांकडे विहीर, बोअर, पाइपलाइन आहे अशा शेतीची नोंद केवळ तीन वर्षांचा पेरा बागायती नाही म्हणून कोरडवाहू अशी करण्यात येत आहे. प्रत्यक्षात सततच्या दुष्काळामुळे काही शेतकरी सातत्याने बागायती करू शकले नाहीत. त्यांनी विहीर, बोअर, पाइपलाइनसाठी कर्जाची उचल केली आहे. आधीच दुष्काळाने त्यांचे कंबरडे मोडले, त्यांच्या रोजीरोटीचे साधनही शासन हिरावत असताना त्यांच्या शेतीची बागायती असताना बागायती नोंद न घेणे अन्यायकारक असून त्यासाठी लावण्यात आलेला निकष तत्काळ रद्द करावा. ज्यांच्याकडे विहीर बोअर, पाइपलाइन आहे त्यांच्या शेतीची बागायती म्हणून नोंद घेण्यात यावी, अशी मागणी करण्यात आली आहे.