सागंली कर्जमाफीतील ‘मिसमॅच-२' यादीतील पात्र-अपात्रतेकडे लक्ष

सांगली : छत्रपती शिवाजी महाराज शेतकरी सन्मान योजनेंतर्गत ‘मिसमॅच-२'' यादीतील २० हजार ८४२ शेतकऱ्यांच्या पात्र-अपात्रतेकडे लक्ष लागले आहे. विकास सोसायटी व बॅंक स्तरावर माहितीची छाननी व लेखापरीक्षकांकडून पडताळणी झाल्यानंतर या शेतकऱ्यांची माहिती तालुकास्तरीय समितीकडे अंतिम निर्णयासाठी जाणार आहे.  याबाबत मुख्यमंत्री देवेंद्र फडणवीस गुरुवारी (दि. ८) व्हिडिओ कॉन्फरन्सद्वारे कर्जमाफी योजनेच्या अंमलबजावणीसंदर्भात आढावा घेणार आहेत. जिल्हा उपनिबंधक, बॅंकांचे प्रतिनिधी यांच्याकडून आढावा घेतला जाणार आहे, अशी माहिती बॅंकेच्या सूत्रांनी दिली. कर्जमाफी योजनेसाठी शेतकऱ्यांनी ऑनलाइन भरलेली माहिती आणि विकास सोसायटी, बॅंकेकडून सादर झालेली माहिती याचा राज्यस्तरावर ताळमेळ न लागलेल्या (मिसमॅच-१) यादीतील ५७ हजार शेतकऱ्यांची माहिती शासनाकडून आली होती. यापैकी ४८ हजार शेतकऱ्यांच्या माहितीची छाननी झाली आहे. ३९ हजार पात्र, तर ९ हजार शेतकरी अपात्र ठरणार असल्याचे स्पष्ट होत आहे. त्रुटींच्या यादीतील १९ हजार ४६३ शेतकरी अपात्र ठरले होते.  जिल्ह्यात एकूण ५८ हजार शेतकरी अपात्र ठरलेले आहेत, तर ९१ हजार शेतकऱ्यांना १८७ कोटींचा लाभ झालेला आहे. दरम्यान, २० हजार ८४२ शेतकऱ्यांची ‘मिसमॅच-२'' यादी शासनाकडून सोमवारी आली आहे. या यादीतील माहितीची विकास सोसायटी व बॅंकस्तरावर छाननी सुरू झाली आहे. संबंधित शेतकऱ्यांनी पूरक माहिती सादर करायची आहे. ‘मिसमॅच-२'' यादीतील माहितीची छाननी झाल्यानंतर लेखापरीक्षकांकडून पडताळणी व त्यानंतर तालुकास्तरीय समितीकडून पात्र-अपात्रतेवर अंतिम शिक्कामोर्तब होणार आहे. ‘मिसमॅच-२'' यादीत किती शेतकरी पात्र, किती अपात्र ठरणार याकडे लक्ष लागले आहे.