सांगलीत वाढली दुष्काळाची दाहकता

सांगली : जिल्ह्यात दुष्काळाची दाहकता वाढत आहे. पंधरा दिवसांत आणखी २० गावांत नव्याने टँकरने पाणीपुरवठा सुरू करण्यात आला आहे. सध्या जिल्ह्यातील ६१ गावे आणि ३८० वाड्या, वस्त्यांना ५१ टँकरद्वारे पाणीपुरवठा सुरू आहे. टॅंकरच्या संख्येत वाढ होण्याची शक्यता आहे. अनेक ठिकाणी खेपा देण्याचे मंजूर आहे. मात्र, मंजूर खेपाप्रमाणे पाणीपुरवठा होत नाही. कागदोपत्री खेपा टाकल्याचे दाखवून बिले काढण्याचा उद्याेग सुरू आहे. संबंधित विभागाने याची चौकशी करावी, अशी मागणी शेतकरी, ग्रामस्थांनी केली आहे. 

पावसाळ्यात दुष्काळी भागातील जत, आटपाडी, खानापूर, कवठेमहांकाळ यासह जिल्ह्यातील काही तालुक्यांत समाधानकारक पाऊस झाला नाही. त्यामुळे सध्या पिण्याचे पाणी आणि चाऱ्याचा प्रश्न गंभीर झाला आहे. गेल्या दोन महिन्यांपासून दुष्काळी तालुक्यातील काही गावांत टँकरने पाणीपुरवठा सुरू करण्यात येत असून, या गावे आणि टँकरच्या संख्येत दिवसेंदिवस वाढत होत आहे.

डिसेंबरअखेर जिल्ह्यातील जत १०, कवठेमहांकाळ पाच, खानापूर तीन, आटपाडी १० आणि तासगाव एक अशा ४१ गावांमध्ये २९ टँकरद्वारे पाणीपुरवठा केला जात होता. यामध्ये जानेवारीपासून दुपटीने वाढ झाली. सध्या जिल्ह्यातील ६१ गावे आणि ३८० वाड्यावस्त्यांना ५१ टँकरने पाणीपुरवठा सुरू आहे. यामध्ये सर्वाधिक जत तालुक्यातील २३, आटपाडी १६, कवठेमहांकाळ ६, खानापूर ५ आणि तासगाव एक अशा ६१ गावांचा समावेश आहे. 

फेब्रुवारीत आणखी संख्या वाढणार

जानेवारीच्या तुलनेत फेब्रुवारीमध्ये उन्हाचा तडाखा आणखी वाढण्याची शक्यता आहे. त्यामुळे आणखी काही गावे आणि वाड्या-वस्त्यांना पाण्याची टंचाई भासण्याची दाट शक्यता असल्याने या ठिकाणी टँकरने पाणीपुरवठा करावा लागणार असून त्यात आणखी वाढ होणार आहे. 

मंजूर खेपा कागदोपत्रीच

दुष्काळाची दाहकता, पाण्याची मागणी वाढतच असताना टँकरचालकांकडून मंजूर खेपा टाकल्या जात नसल्याच्या तक्रारी शेतकरी करीत आहेत. आठ-आठ दिवस पाण्याचा टँकर येत नाही. या कालावधीत पाणी कोठून आणायचे, हा प्रश्न आहे. सध्या ६१ गावे आणि ३८० वाड्यावस्त्यांना १४७ खेपा मंजूर आहेत. मात्र अनेक ठिकाणी याप्रमाणे खेपा टाकल्या जात नाहीत. कागदोपत्री खेपा टाकल्याचे दाखविण्यात येत असल्याच्या तक्रारी आहेत.