सांगली बाजारात हळदीला सरासरी ७ हजार ५०० रुपये दर

सांगली ः हळदीच्या उत्पादनात वाढ झाल्याने सांगली बाजारामध्ये प्रमाणापेक्षा अधिक अावक झाली अाहे. त्याचा परिणाम दरावर ही झाला अाहे. सध्या सांगली बाजार समितीत हळदीला सरासरी ७ हजार ५०० रुपये असा दर मिळतो आहे. देशामध्ये अपेक्षेपेक्षा हळदीचे उत्पादन वाढल्याने त्याचा प्रतिकूल परिणाम हळदीच्या दरावर झाला आहे. गेल्या पंधरा दिवसांत हळदीचे दर १ हजार ५०० रुपयांनी कमी झाले आहे. अतिरिक्त उत्पादनाचा हळद शेतकऱ्यांना फटका बसला आहे.

देशात यंदा ६५ ते ७० लाख पोत्यांचे (६० किलोचे एक पोते) उत्पादन होईल, असा अंदाज हळद उद्योगातील तज्ज्ञांनी व्यक्त केला होता. दरम्यान, हळदी हंगामाच्या सुरवातीस हळदीचे दर प्रतिक्विंटलला दीड हजार रुपयांनी वाढ होऊन ते सरासरी १० ते ११ हजारपर्यंत होते. त्यामुळे तेजी असल्याने हळद विक्रीसाठी शेतकरी पुढे आहे. मात्र, अपेक्षेपेक्षा १० लाख पोत्यांनी हळदीच्या उत्पादनात वाढ झाली. याचा परिणाम हळदीच्या दरावर होऊ लागला. मात्र, हळदीचे दर टिकून राहिले नाहीत. हळदीच्या उत्पादनात झालेली वाढ आणि हळदीची कमी झालेली मागणी यामुळे देशांतर्गत हळदीच्या दरात सुमारे दीड हजार रुपयांनी घसरण झाल्याने हळदीचा रंग फिका झाला. हळदीच्या दरात १ हजार ५०० रुपयांनी घट झाली.

सांगली बाजार समितीत नांदेड, पश्‍चिम महाराष्ट्र, कर्नाटक, आंध्र प्रदेश, तमिळनाडू बसमत या भागातून हळद विक्रीसाठी येते. या राज्यातून अजून १ लाख पोती विक्रीस येणे अपेक्षित आहे. मात्र, हळदीच्या दरात घसरण झाल्याने एक लाख पोती शिल्लक राहतील असा अंदाज व्यापाऱ्यांकडून व्यक्त होत आहे. सध्या आंध्र, तमिळनाडू, तेलंगणा या राज्यांत हळदीला सरासरी ६ हजार ५०० ते ७ हजार ५०० रुपये असा दर मिळत असल्याची माहिती व्यापारी वर्गाने दिली. यामुळे हळद उत्पादक शेतकरी हवालदिल झाला आहे.

शेतकऱ्यांकडे २० लाख पोती शिल्लक देशात अपेक्षेपेक्षा १० लाख पोत्यांचे अतिरिक्त उत्पादन वाढून ते सुमारे ८० लाख पोत्यांचे उत्पादन झाले. अद्याप देशभरातील शेतकऱ्यांकडे २० लाख पोती हळद शिल्लक आहे.  

शेतकरी म्हणतात... दर कमी करण्यासाठी व्यापारीच कारणीभूत आहेत. आवक कमी आहे. मात्र, दर वाढविण्यासाठी व्यापारी पुढे येत नाहीत. व्यापाऱ्यांनीच हळदीचे दर पाडले आहेत.