सांगलीच्या आणखी २८६१ शेतकऱ्यांना कर्जमाफीचा लाभ

सांगली ः छत्रपती शिवाजी महाराज शेतकरी सन्मान योजनेअंतर्गत पात्र लाभार्थींची आठवी ग्रीन लिस्ट अखेर प्रसिद्ध झाली आहे. जिल्ह्यात आणखी २ हजार ८६१ शेतकरी कर्जमाफी, प्रोत्साहन अनुदानाचे लाभार्थी ठरले आहेत. लाभाची रक्कम ५ कोटी ३९ लाख १३ हजार ४४९ रुपये आहे. ६९ शेतकरी ओटीएससाठी पात्र ठरले आहेत. त्यांनी २३.८४ लाख भरल्यास त्यांचे ४६.४८ लाख माफ होणार आहेत, अशी माहिती जिल्हा बॅंकेच्या सूत्रांनी दिली.

मिसमॅच व अनमॅच यादीतील त्रूटी दूर करून शेतकऱ्यांची नावे आठव्या ग्रीन लिस्टमध्ये अंतर्भूत होणार होती. शिवाय काही शेतकरी हे कर्जमाफी, प्रोत्साहन अनुदानासाठी पात्र आहेत, पण सात ग्रीन लिस्टमध्ये त्यांचा समावेश नाही. तेही आठव्या ग्रीन लिस्टच्या प्रतीक्षेत होते. आठवी ग्रीन लिस्ट प्रसिद्ध झाली आहे. कर्जमाफीसाठी ४०३ शेतकरी पात्र ठरले आहेत. कर्जमाफीची रक्कम १ कोटी ३७ लाख ४८ हजार ८६३ आहे. प्रोत्साहन अनुदानासाठी २ हजार ४५८ शेतकरी पात्र ठरले असून अनुदानाची रक्कम ४ कोटी १ लाख ६४ हजार ५८६ रुपये आहे.

ओटीएससाठी ६९ शेतकरी पात्र ठरले आहेत. दीड लाखावरील कर्जाची रक्कम भरल्यास दीड लाखाचे कर्ज माफ होते. त्याअंतर्गत दीड लाखावरील कर्जाचे २३ लाख ८४ हजार २५१ रुपये भरल्यास ४६ लाख ४७ हजार ९७२ शेतकऱ्यांचे कर्ज माफ होणार आहे. ओटीएसमध्ये सहभाग घेण्यासाठी ३० जून अंतिम मुदत आहे. संबंधित शेतकऱ्यांनी दीड लाखावरील कर्जाची रक्कम भरून दीड लाखापर्यंतच्या कर्जमाफीचा लाभ घ्यावा, असे आवाहन जिल्हा बॅंकेचे अध्यक्ष दिलीप पाटील यांनी केले आहे.