संग्रामपूर तूर खरेदी केंद्र अखेर सुरू

बुलडाणा  : संग्रामपूर येथील तूर खरेदी केंद्रावर जागेअभावी तूर खरेदी बंद होती. स्वाभिमानी शेतकरी संघटनेने आंदोलनाचा इशारा दिल्यानंतर सोमवारपासून केंद्र सुरू झाले. या तूर खरेदी केंद्रावर तालुक्यातील ५,१९९ शेतकऱ्यांनी ऑनलाइन नोंदणी केली होती. त्यापैकी फक्त ५०५ शेतकऱ्याचेंच तुरीचे मोजमाप झाले. पण उर्वरित ४,६९४ शेतकऱ्यांची तूर अजूनही घरात पडून आहे. त्या शेतकऱ्यांची तूर केव्हा मोजणार हा प्रश्न शेतकऱ्यांसमोर उभा होता.

याचीच दखल घेत स्वाभिमानी शेतकरी संघटनेचेे युवा जिल्हाध्यक्ष प्रशांत डिक्कर यांच्या नेतृत्वात ७ एप्रिलला जिल्हाधिकारी यांना निवेदन देऊन तत्काळ तूर खरेदी केंद्र सुरू करा, जागा नसेल तर आमचे घर घ्या; पण तूर खरेदी सुरू करा; अन्यथा आंदोलन करण्याचा इशारा दिला होता. याच धसक्याने सोमवारपासून (ता. १६) संग्रामपूर तूर खरेदी केंद्र सुरू करून  शेतकऱ्यांची तूर खरेदी सुरू केली. त्यामुळे शेतकऱ्यांमध्ये आनंदाचे वातावरण आहे.