सायगावच्या सरपंचांचा प्लॅस्टिकमुक्तीचा विडा

सायगाव : ग्रामपंचायतीचे सरपंच अजित आपटे यांनी प्लॅस्टिकमुक्तीचा विडा उचलला असून, त्याची सुरवात त्यांनी गावात असलेल्या लोहिया विद्यालय व ज्युनिअर कॉलेजमधील विद्यार्थी, शिक्षकांना विद्यालय भरण्याच्या पहिल्याच दिवशी ५०० कापडी पिशव्यांचे वाटप करून केली.

लोहिया विद्यालयात नवागत विद्यार्थी व शिक्षकांना प्रत्येकी एक कापडी पिशवी भेट देवून प्लॉस्टिकचा वापर यापुढे कधीही करू नका, इतरांत प्रबोधन करा, असे आवाहनही श्री. आपटे यांनी केले.

पिशवीवर ‘आम्ही सायगावकर, सुंदर व स्वछ प्लॅस्टिकमुक्त सायगाव’ असा संदेशही छापण्यात आला आहे. हा उपक्रम राबविण्यासाठी विद्यालयातील शिक्षक, ग्रामपंचायतीचे सदस्य व ग्रामस्थ मदत करणार आहेत.

सरपंच आपटे यांनी प्लॅस्टिकमुक्तीसाठी कापडी पिशव्यांचे वाटप करून समाजापुढे खरोखर एक चांगला आदर्श घालून दिला आहे. यापुढे दर आठवड्याला आम्ही प्लॅस्टिकमुक्तीसाठी कार्यक्रम घेणार आहोत, असे प्राचार्य नंदकुमार जगताप यांनी सांगितले.