‘राज्य सुकाणू समितीची शनिवारी नगरला बैठक’

नगर ः शेतकरी संघटनांच्या राज्य सुकाणू समितीनतर्फे शहीद दिनापासून (२३ मार्च) राज्यव्यापी ‘हुतात्मा अभिवादन व शेतकरी जागर यात्रा’ काढली जाणार आहे. त्यानुसार आंदोलनाच्या पूर्वतयारीसाठी राज्य सुकाणू समितीची शनिवारी (ता. २४) नगरला बैठक होणार असून, नगर जिल्ह्याच्या प्रश्‍नाबाबत कार्यकर्त्यांशी चर्चा होणार असल्याची माहिती शेतकरी संघटनेचे पश्‍चिम महाराष्ट्र विभागप्रमुख बाळासाहेब पटारे, किसान सभेचे सरचिटणीस बन्सी सातपुते यांनी दिली. नगरच्या सरकारी विश्रामगृहावर होणाऱ्या बैठकीत समविचारी संघटनांच्या बैठकीत इच्छुक इतर संघटनांचा जिल्हा सुकाणू समितीत समावेश करणे, सुकाणू समितीची फेररचना करणे, आंदोलन काळात जिल्ह्यातील कार्यक्रमाची आखणी करणे, नियोजन करून जबाबदाऱ्या सोपविणे, आदी महत्त्वपूर्ण निर्णय करण्यात येणार आहेत. शेतकरी संघटनेचे अध्यक्ष व सुकाणू समितीचे ज्येष्ठ सदस्य रघुनाथदादा पाटील, आमदार बच्चू कडू, समन्वयक डॉ. अजित नवले, डॉ. बाबा आढाव, नामदेव गावडे, सुशीलाताई मोराळे, कालिदास आपेट, डॉ. अशोक ढवळे, प्रतिभाताई शिंदे, करण गायकर, किशोरजी ढमाले, गणेशकाका जगताप, संजय पाटील घाटनेकर, शिवाजीनाना नांदखिले, अजय महाराज बारस्कर, संजीव भोर, अनिल देठे, संतोष वाडेकर, राजूभाऊ देसले, डॉ. विश्वास उटगी, सचिन धांडे, सुभाष काकूस्ते, एस. बी. नाना पाटील, विठ्ठलराव पवार यांच्यासह प्रमुख कार्यकर्ते उपस्थित राहणार आहेत. जिल्हा सुकाणू समितीशी संलग्न असणाऱ्या शेतकरी संघटना, प्रहार संघटना, महाराष्ट्र किसान सभा, भारतीय किसान सभा, शिवप्रहार संघटना, छावा क्रांतिवीर सेना, शेकाप, लाल निशाण शेतकरी कष्टकरी संघटना, हमाल मापडी महामंडळ, सत्यशोधक शेतकरी सभा, बळिराजा शेतकरी संघ, भूमिपुत्र संघटना, बळिराजा संघटना, आम आदमी शेतकरी आघाडी, क्रांतिसिंह नानापाटील ब्रिगेड, लोकसंघर्ष मोर्चा, शेतकरी संघर्ष समिती, प्रहार शेतकरी वारकरी संघटना, आदी संघटनांच्या कार्यकर्त्यांनी बैठकीत सहभागी व्हावे, असे पटारे म्हणाले.