मोठ्या प्रकल्पांत समाधानकारक जलसाठा

जळगाव : जिल्ह्यातील मोठ्या प्रकल्पांमध्ये गणल्या जाणाऱ्या गिरणा व वाघूर धरणांचा साठा बऱ्यापैकी असून, त्यात आणखी वाढ होईल, अशी अपेक्षा आहे. गिरणामध्ये ४७.७७ टक्के, तर वाघूरमध्ये ४५.२१ टक्के जलसाठा आहे. वाघूरमध्ये जलसाठा वाढल्याने जळगाव, जामनेरचा दोन वर्षांचा पाणीप्रश्‍न सुटणार आहे. तसेच या धरणातून भुसावळ, जळगाव तालुक्‍यातील शेतकऱ्यांना रब्बीसाठी दोन आवर्तने दिली जातील, अशी स्थिती असल्याने शेतकऱ्यांमध्ये समाधान आहे.

गिरणाचा जलसाठा मागील तीन दिवसांत दोन टक्‍क्‍यांनी वाढला आहे. हतनूर धरणात ५०.९० टक्के जलसाठा आहे. त्याचे दोन दरवाजे दीड मीटरने उघडे आहेत. तापी नदीवरील धुळे जिल्ह्यातील सुलवाडे बॅरेजचे पाच दरवाजे एक मीटरने उघडे आहेत. शहादा (जि. नंदुरबार) तालुक्‍यातील तापी नदीवरील प्रकाशा बॅरेजचे सहा दरवाजे दोन मीटरने, तर सारंगखेडा बॅरेजचे सहा दरवाजे दोन मीटरने उघडे आहेत.

केळी उत्पादनासाठी प्रसिद्ध असलेल्या रावेर तालुक्‍यातील मंगरूळ, अभोरा व सुकी हे मध्यम प्रकल्प १०० टक्के भरले आहेत. चोपडा (जि. जळगाव) व धुळे जिल्ह्याला लाभदायी असलेले अनेर धरण ६२.३९ टक्के भरले आहे. यावल तालुक्‍यातील सातपुडा पर्वतालगतचे मोर धरण ५० टक्के भरले आहे.

पाचोरा तालुक्‍यातील मध्यम प्रकल्पांमध्ये बहुळा प्रकल्प कोरडाच आहे. हिवरा प्रकल्पात ३०.३३ टक्के जलसाठा आहे. जामनेर तालुक्‍यातील तोंडापूर प्रकल्पाचा साठा किरकोळ वधारला असून, तो २.०५ टक्के झाला आहे. पश्‍चिम भागातील भोकरबारी, मन्याड, अंजनी, बोरी हे प्रकल्प कोरडेच आहेत.

धुळे जिल्ह्यातील पांझरा प्रकल्प ओव्हरफ्लो झाला आहे; परंतु नदीमध्ये पाण्याचा विसर्ग बंद करण्याची स्थिती आहे. कारण पाऊस नाही. नंदुरबार जिल्ह्यातील मध्यम प्रकल्पांमध्येही समाधानकारक साठा नसल्याची माहिती मिळाली.