बचत गटांच्या वस्तूंचे नागपूरकरांना आकर्षण

नागपूर : दक्षिण-मध्य सांस्कृतिक केंद्राच्या प्रांगणात ग्रामविकास व पंचायत राज विभागातर्फे आयोजित महालक्ष्मी सरस प्रदर्शन सणासुदीच्या काळामध्ये नागपुरकरांमध्ये आकर्षणाचे केंद्र ठरत आहे. विविध राज्यांतील १६० पेक्षा अधिक बचत गटांचे विविधांगी वस्तूंचे स्टॉल्स येथे लागलेले आहेत.

राज्यभरातील बचत गटांच्या माध्यमातून लोककलेचा वारसा जपलेले अनेक शुशोभित वस्तू या प्रदर्शनात आहेत. ओरिसा येथील ‘माँ मंगला’ या महिला बचत गटातर्फे निर्मित कापडी पिशव्या, सुशोभित कापडी पर्सेस, मोबाईल पाऊच अशा हस्तनिर्मित उपयोगी उत्पादने ग्राहकांचे मन वेधून घेत आहेत. या बचत गटामध्ये ५० महिला काम करीत असून त्यांना यातून चांगली मिळकत होत आहे.

येथील ‘सिद्धार्थ स्वयं सहायता महिला बचत गटा’तर्फे मधमाश्‍या पालन हा व्यवसाय केला जातो. हा मधही येथे उपलब्ध आहे. मधमाश्‍या पालनासाठी येथे सातेरी तसेच इटालियन मधूमक्षिकांचा वापर करण्यात येतो. प्रामुख्याने इटालियन मधूमक्षिका सर्वाधिक उत्पादन देतात. बचत गटांच्या माध्यमातून या मधमाश्‍यांना मधू पेट्यांमध्ये पाळतात. या मधमाश्‍यांच्या पेट्या मोहरी, ओवा, धने, सूर्यफूल आदीच्या पिकात ठेवण्यात येतात. शेती उत्पादनात परागी भवनात मधमाश्‍यांचे महत्त्व आहे. यामुळे केवळ मधमाश्‍या पालनाविषयी माहिती जाणून घेण्यासह विविध चवींचा मध चाखण्यासाठीदेखील या स्टॉलवर विशेष गर्दी होत आहे.