पुणे जिल्हा परिषदेत दर रविवारी ‘सावित्री आठवडा बाजार’

पुणे  : स्वयंसहायता समूहाच्या (बचत गट) माध्यमातून एकत्रित येऊन परंपरागत आणि नैसर्गिक बाबींचा उपयोग करून तयार केलेल्या उत्पादनांना योग्य ठिकाणी हक्काची बाजारपेठ मिळावी, या उद्देशाने दर रविवारी जिल्हा परिषदेच्या वाहनतळावर ‘सावित्री आठवडा बाजार’ सुरू करण्याचा निर्णय घेण्यात आला आहे, अशी माहिती जिल्हा ग्रामीण विकास यंत्रणेचे प्रकल्प संचालक प्रभाकर गावडे यांनी दिली. 

प्रजासत्ताकदिनी (शनिवारी, ता. २६) जिल्हा परिषदेचे अध्यक्ष विश्‍वास देवकाते, मुख्य कार्यकारी अधिकारी सूरज मांढरे यांच्यासह पदाधिकारी व अधिकाऱ्यांच्या उपस्थितीत या उपक्रमाचे प्रातिनिधिक उद्घाटन होणार आहे. रविवारपासून (ता. २७) दर रविवारी हा आठवडे बाजार सुरू राहणार आहे. आठवडा बाजारात २२ स्टॉल सुरू करण्यात येणार आहेत. आठवडे बाजारात सहभागी होऊ इच्छिणाऱ्या बचत गटांनी नोंदणी करणे आवश्‍यक आहे. बाजार सुरू झाल्यानंतर दोन महिन्यांनी रोटेशन पद्धतीने नवीन बचत गटांना संधी देण्यात येईल. 

महाराष्ट्र ग्रामीण जीवन्नोती अभियानांतर्गत जिल्ह्यात ५८७८ बचत गट सुरू आहेत. या स्वयंसहायता बचत गटांनी उत्पादित केलेल्या लोणची, वनस्पतींपासून तयार करण्यात आलेले तेल, मध, सेंद्रिय हळद, गूळ, हातसडीचा तांदूळ, कापडी पिशव्या, लाकडी खेळणी, सेंद्रिय व जैविक खते, बांबूपासून बनविलेल्या वस्तू, कडधान्य, घोंगडी आदी वैशिष्ट्यपूर्ण ग्रामीण उत्पादनांची विक्री या आठवडे बाजारात होणार आहे.