विश्‍वासघातकी सरकारला शेतकरी घरी पाठवतील ः सावंत

नगर ः भाजप सरकारने जाहीरनाम्यात शेतकरी, शेती विकासाचे आश्‍वासन दिले होते. त्यामुळे शेतकऱ्यांनी भाजपला मदत केली. मात्र, आश्‍वासनाचा विसर पडल्याने तीन राज्यांत झटका दिला. आता विश्‍वासघातकी सरकारला शेतकरी घरी पाठवतील. येत्या स्वातंत्र्यदिनी पंतप्रधान नरेंद्र मोदी यांना लाल किल्ल्यावर झेंडावंदन करता येणार नाही, याची व्यवस्था शेतकरी करतील, असा इशारा ‘स्वाभिमानी’चे नेते दशरथ सावंत यांनी दिला आहे. 

स्वामिनाथन समितीच्या शिफारसी तातडीने लागू कराव्यात, वीजबिल संपूर्णपणे माफ करावे, कांद्याचा प्रश्‍नावर सरकारने तातडीने तोडगा काढावा व सध्याच्या दुष्काळी स्थितीवर तातडीने उपाययोजना कराव्यात या मागणीसाठी गुरुवारी (ता. १०) नेवासे फाटा (ता. नेवासा) येथे स्वाभिमानी शेतकरी संघटनेतर्फे रास्ता रोको आंदोलन करण्यात आले. 

संघटनेचे प्रदेशाध्यक्ष प्रकाश पोपळे, माजी प्रदेशाध्यक्ष दशरथ सावंत, जिल्हाध्यक्ष अंबादास कोरडे, गुलाबराव डेरे, विठ्ठल शेळके, शंकर लहाणे, ज्ञानेश्‍वर सोडणर, प्रताप पटारे यांच्यासह पदाधिकारी आणि शेतकरी सहभागी झाले होते.