नाशिक जिल्ह्यात निवडणूक अधिकाऱ्यांचा मानधन घोटाळा

नाशिक जिल्ह्यात निवडणूक अधिकाऱ्यांचा मानधन घोटाळा
नाशिक जिल्ह्यात निवडणूक अधिकाऱ्यांचा मानधन घोटाळा

नाशिक : नाशिक जिल्ह्यातील मालेगाव तालुक्यात निवडणूक कामासाठी नेमलेल्या केंद्रस्तरीय अधिकाऱ्यांना (बीएलओ) देण्यात येणाऱ्या मानधन वाटपात आर्थिक घोटाळ्याची चौकशी करणाऱ्या समितीला अनेक धक्कादायक बाबी आढळल्या असून, शासकीय पातळीवरील भ्रष्टाचाराला पायबंद घालण्याची जबाबदारी असलेल्या लाचलुचपत प्रतिबंधक खात्यातील काही सेवानिवृत्त पोलिस कर्मचाऱ्यांनाही कागदोपत्री बीएलओ दाखवून त्यांच्या नावावर पैसे लाटल्याचे उघड झाले आहे. या साऱ्या प्रकरणात दोषी असलेल्या एका नायब तहसीलदाराला मात्र पाठीशी घातले जात असल्याचेही कागदपत्रांवरून स्पष्ट झाल्याचे सूत्रांचे म्हणणे आहे.

मालेगाव तालुक्यात निवडणूक कामासाठी पाचशेहून अधिक बीएलओंची नेमणूक करण्यात आलेली असून, त्यांच्या नावे दरवर्षी हजारो रुपयांचे मानधन बॅँक खात्यात जमा केले जात आहे. तथापि, दरवर्षी मानधन घेणाऱ्या बीएलओंकडून मात्र निवडणूक आयोगाचे काम केले जात नसल्याचे लक्षात आल्यावर चौकशी केली असता, बहुतांशी बीएलओ कागदोपत्री दाखवून त्यांच्या नावे बँक खात्यात पैसे जमा करून नंतर या रकमेचा अपहार केल्याचे उघड झाले होते.

यासंदर्भात मालेगाव तहसील कार्यालयातील सोनवणेनामक कर्मचाऱ्यावर गुन्हाही दाखल करण्यात आला आहे. मात्र, या कर्मचाऱ्याला अद्यापही पोलिसांनी अटक केली नसल्याचे व त्यामुळे त्याचे निलंबन रखडल्याचे बोलले जात असले तरी, या साऱ्या घोटाळ्यात निवडणूक नायब तहसीलदाराची महत्त्वाची भूमिका असून, त्याच्या संमतीशिवाय हा घोटाळा होऊच शकत नसल्याचे जाणकारांचे म्हणणे आहे. मात्र, त्याला सोयीस्कर पाठीशी घालण्यात येत असून, त्याबाबत वारंवार वरिष्ठ कार्यालयाला कळवूनही नायब तहसीलदार सहीसलामत सुटल्याचे सांगितले जात आहे.  

बीएलओंच्या मानधन घोटाळ्यात ज्याच्यावर गुन्हा दाखल करण्यात आला. त्या सोनवणेचे नातेवाईक, पत्नी, मित्र, मैत्रिणींना कागदोपत्री बीएलओ दाखविण्यात आले, त्याचबरोबर काही पोलिस कर्मचाऱ्यांचीही नावे त्यात घुसडविण्यात आल्याचे चौकशीत उघड झाले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com