लग्नातील आहेरातून करणार शाळेचे संगणकीकरण

सोलापूर : निसर्ग देवता प्रसन्न... चालावा जगाचा प्रवाह, व्हावा निसर्ग गुणांचा निर्वाह, यासाठी योजिला विवाह, धर्मज्ञानी तयांचा..! या संत श्रेष्ठ तुकडोजी महाराज यांच्या ग्रामगीतेतील ओळींसोबतच हे मानवा जागा हो, जलसंधारण व वृक्षारोपणाचा धागा हो...! असा संदेश ढोराळे (ता. बार्शी) येथील चोरमुले कुटुंबीयांनी लग्नपत्रिकेतून दिला आहे. रोख स्वरूपातील आहेर स्वीकारून व स्वत:ची रक्कम घालून जिल्हा परिषद शाळा संगणकीकरण करण्याचा आगळावेगळा संकल्पही या निमित्ताने करण्यात आला आहे.

शेतकरी असलेल्या सुधामती आणि बळिराम चोरमले यांचे चिरंजीव पवन यांचा विवाह येत्या रविवारी (ता. २४) होणार आहे. कृषी पदवी संपादन केलेले पवन हे सध्या सोलापुरात एलआयसीमध्ये डेव्हलपमेंट ऑफिसर पदावर कार्यरत आहे. त्यांचा विवाह दिवंगत नंदकिशोर वाघमोडे यांची कन्या पल्लवी हिच्यासोबत होणार असून, त्या डॉक्‍टर आहेत. लग्नकार्यात फटाके, बॅंडबाजासह इतर ठिकाणी होणारा अनावश्‍यक खर्च टाळण्याचा निर्णय घेण्यात आला आहे.

गावातील जिल्हा परिषद शाळा संगणकीकरण करण्यासाठी लग्नात आहेर म्हणून येणारी रक्कम व स्वत:ही काही रक्कम घालून मदत करण्यात येणार आहे. लग्नातील अक्षता सोहळाही आगळावेगळा असणार आहे. तांदळाची नासाडी न करता फक्‍त टाळ्या वाजविण्यात येणार आहेत.

लग्नपत्रिकेवर देवांची, महापुरुषांची, राजकीय नेत्यांची छायाचित्रे प्रसिद्ध केल्याचे आपण पाहिले असेल, पण चोरमले कुटुंबीयांनी लग्नपत्रिकेत बेटी बचाओ, बेटी पढाओ, स्वच्छ भारत, डिजिटल स्कूल आणि वृक्षारोपणाचा संदेश देणारी चित्रे प्रसिद्ध केली आहेत. अनावश्‍यक खर्च टाळून पर्यावरणपूरक आणि सामाजिक संदेश देणारा लग्नसोहळा का केला.

याबाबतची माहिती देण्यासाठी एक बुकलेटही प्रसिद्ध करण्यात येणार आहे. लग्नाला येणाऱ्या मित्र आणि नातेवाइकांना ते देण्यात येईल. लग्नातील सामाजिक उपक्रमांसाठी मित्र प्रशांत पाटील, रवींद्र माने यांचे सहकार्य मिळाल्याचे सांगितले.