नाशिक जिल्ह्यात बिबट्यांचा धुमाकूळ

नाशिक जिल्ह्यात बिबट्यांचा धुमाकूळ
नाशिक जिल्ह्यात बिबट्यांचा धुमाकूळ

नाशिक : नाशिक शहर व जिल्ह्यात बिबट्याच्या हल्ल्याच्या अनेक घटना ताज्या असतानाच माडसंगवी शिवारातील मळ्यात बिबट्याने हल्ला केला. यामध्ये एक वासरू व एक पारडू ठार झाले. परिसरात बिबट्याचे ठसे आढळले. तसेच वन विभागाच्या अधिकाऱ्यांनी पाहणी केल्यानंतर बिबट्याने हल्ला केल्याचे सिद्ध झाले आहे. 

मंडसंगवी शिवारातील डॉ. समीर पेखळे यांच्या घरापासून दोनशे मीटरवर असलेल्या गोठ्यात बिबट्याने हल्ला केला. सकाळी गोठ्याची पाहणी करत असताना वासरू व पारडू मृतावस्थेत आढळले. या बाबत वन विभागाला कळविण्यात आले. जवळच उसाचा मळा असल्याने लपला असल्याची शक्यता आहे. त्यामुळे माडसंगवी परिसरात भीतीचे वातावरण आहे. 

शहरातील आडगाव परिसर येथे यापूर्वी चार शेळ्या हल्ल्यात मृत्युमुखी पडल्या होत्या. तसेच नाशिक तालुक्यात नानेगाव, बेलत गव्हाण, शेवगे दारणा तसेच निफाड तालुक्यात कारसुळ, रौळस, नारायण टेंभी, वडाळी नजीक परिसरात बिबट्याची दहशत आहे. याठिकाणी ही शेळी, कुत्रे यांच्यावर हल्ले झाले आहेत. 

मागील आठवड्यात दिंडोरी तालुक्यातील परमोरी येथे बिबट्याच्या हल्ल्यात चार वर्षीय बलिकेचा मृत्यू झाला आहे.  परमोरी परिसरात वन विभागाने पिंजरे लावून बिबट्यांना जेरबंद करण्याची मागणी होत आहे. पशु तसेच माणसांवर हल्ल्याचे प्रमाण वाढले आहे. यामुळे वेळीच वन विभागाने बिबट्याला जेरबंद करावे, अशी मागणी केली जात आहे.

अन्यथा निवडणुकांवर बहिष्कार परमोरी येथे गेल्या सहा महिन्यांत बिबट्याच्या हल्ल्यात दोन लहान बालकांचा मृत्यू झाला आहे. त्यामुळे ग्रामस्थांनी संताप व्यक्त केला आहे. येणाऱ्या पंधरा दिवसांत वनविभागाने बिबटे जेरबंद केले नाहीत, तर येत्या लोकसभा व विधानसभा निवडणुकीत मतदानावर बहिष्कार टाकण्याचा निर्णय ग्रामस्थांनी घेतला आहे.

बिबट्याने हल्ला केल्यानंतर पोलिस यंत्रणा व वन विभागाला कळविण्यात येते. अशा वेळी पोलिस यंत्रणा वेळेवर हजर होते. मात्र, वन विभाग वेळेवर हजर न होता हलगर्जीपणा करते. बिबट्यांच्या हल्ल्याच्या घटनांमुळे शेतकरी व सर्वसामान्यांमध्ये भीतीचे वातावरण आहे. जोपर्यंत बिबट्या जेरबंद होत नाही. तोपर्यंत येणाऱ्या निवडणुकांवर बहिष्कार टाकण्याचा निर्णय ग्रामस्थांनी सर्वानुमते घेतला आहे. - बाळासाहेब काळोगे, माजी सरपंच, परमोरी, ता. दिंडोरी

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com