यंदाचा हंगाम गेलाच, पुढच्याची चिंता

संग्रहित छायाचित्र
संग्रहित छायाचित्र

औरंगाबाद : मुख्य नगदी पीक कपाशीवर यंदा शेंदरी बोंडअळीचा झालेला आघात शेतकऱ्यांना असहनीय झाला आहे. यंदाचा हंगाम गेला, पुढच्या हंगामाचे काय याचीदेखील शेतकऱ्यांना चिंता आहे. काही शेतकऱ्यांनी त्यासाठी बैठका घेऊन नेमके काय करावे याविषयी मंथन सुरू केले आहे. तसेच जी फॉर्मच्या माध्यमातून आपले नुकसान सरकारच्या दरबारी मांडण्याची तयारी शेतकऱ्यांनी चालविली आहे.

मराठवाड्यात सरासरी ९१ टक्‍के अर्थात १५ लाख ६४ हजार ९४ हेक्‍टरवर कपाशीची लागवड झाली. खरिपाची जवळपास सर्वच पिके गेल्यानंतर प्रदीर्घ खंडानंतर आलेल्या परतीच्या पावसामुळे शेतकऱ्यांनी कपाशीची सोय केली. त्यामुळे काहीअंशी उत्पादनाची आशा निर्माण झाली.

परंतु शेंदरी बोंडअळीने शेतकऱ्यांच्या या आशेवर पाणी फेरले आहे. नुकसान व उपस्थित झालेल्या प्रश्नांना अनुसरून पंचानामे कधी होतात याकडे शेतकऱ्यांचे लक्ष लागले आहे. ज्या शेतकऱ्यांनी कृषी विभागाकडे याविषयी माहिती दिली त्यांची प्रत्यक्ष शहानिशा करण्याची तसदी जिल्हा परिषद व शासनाच्या कृषी विभागाकडून घेतली गेली नसल्याचे  शेतकऱ्यांचे म्हणणे आहे.

शेतकऱ्यांमधील संभ्रम दूर करण्यासाठी त्यांच्या शंकांचे निरसन करून तंत्रज्ञान चुकीचे दिलेय की ते वापरताना चूक झाली यासाठी शासन, प्रशासन व शास्त्रज्ञांच्या माध्यमातून समन्वयाने मार्ग काढण्याची गरज निर्माण झाली आहे.

कृषी विकास शेतकरी बचत गटाचा पुढाकार जालना जिल्ह्यातील पाच गावांत काम करणाऱ्या कृषी विकास शेतकरी बचत गटाने यंदाचे नुकसान भरून काढण्यासाठी नेमके काय करायचे, शासन दरबारी कसा लढा द्यायचा, पुढील हंगाम सुरक्षित करायचा, सरकारने, तज्ज्ञांनी यावर तोडगा काढण्यासाठी नेमके काय करायला हवे, यांसह जी फॉर्म भरून देण्यासाठी पावले उचलण्याचा निर्णय १५ नोव्हेंबरला झालेल्या गटाच्या बैठकीत घेतला.

आमच्या गटाने जी फॉर्म भरून देऊन नुकसानभरपाई मिळावी यासाठी पावले उचलण्याचा निर्णय घेतला. पर्यायी पीक नसल्याने तज्ज्ञांनी पुढील हंगाम सुरक्षित होईल यासाठी उपाय योजावेत. - निवृत्ती घुले, अध्यक्ष कृषी विकास शेतकरी बचत गट, वखारी, जि. जालना.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com