बियाणे कंपन्यांत पाकिटावरील माहितीप्रकरणी संभ्रमावस्था

नागपूर : बोंड अळीचा प्रादुर्भाव रोखण्यासाठी या वर्षी कमी कालावधीचे कापूस वाणाला प्रोत्साहन देण्यासोबतच पाकिटावर काही सूचना बियाणे कंपन्यांना लिहिण्याचे सक्‍तीचे केल्या जाणार, अशी माहिती अवर मुख्य सचिव (कृषी) विजय कुमार यांनी ॲग्रोवनला दिली होती. परंतु येत्या हंगामातील बियाणे कंपन्यांचे नियोजन तोंडावर असताना त्या संदर्भातील आदेश अद्याप निघाले नसल्याने कंपन्यांमध्ये संभ्रमावस्था आहे.  बोंड अळीचा प्रादुर्भाव येत्या हंगामात होऊ नये, याकरिता १८० दिवसांच्या कापूस वाणांना लागवडीसाठी प्रोत्साहन देणे, पाकिटावर कोरडवाहू किंवा बागायती क्षेत्रासाठी उल्लेख असणे, त्यासोबतच गुलाबी बोंड अळीला प्रतिकारक वाण नाही, असे नमूद असणे सक्‍तीचे केले जाणार आहे. अवर मुख्य सचिव (कृषी) विजयकुमार यांनी ही माहिती दिली होती. परंतु त्या संदर्भातील लेखी आदेश केंद्र किंवा राज्य सरकार स्तरावर निघाले नाही. परिणामी हंगाम तोंडावर असताना कंपन्यांमध्ये मात्र बियाणे पाकिटांचे प्रिटिंग करण्यासंबंधी संभ्रमावस्था आहे. मार्च महिन्यात बियाणे पाकिटांचे प्रिटिंग पूर्ण होऊन बाजारात बियाणे पुरवठा होतो. या प्रक्रियेला काही दिवसच शिल्लक असल्याची माहिती कंपनी सूत्रांनी दिली. सरकारने पाकिटावर काय नमूद असावे, यासंबंधी लेखी आदेश काढावेत, त्यामुळे पाकिटाच्या प्रिटिंगचा निर्णय कंपन्यांना लवकर घेता येणार आहे. एेनवेळी अशाप्रकारचा निर्णय झाल्यास पाकिटे पुन्हा प्रिटिंग करणे शक्‍य होणार नाही, असेही सूत्रांकडून सांगण्यात आले.